Uzulu wase-Melika ubethe gwaqa phambi kwemisakazo kabomabonakude leye-radio, elalele umbiko obusethulwa nguMongameli Joseph Biden wele-Melika, owe-State of the Union address.
UMnu. Biden, owethule lumbiko phambi kwamalunga amadale amabili; ele-Senate lele-House of Representatives, e-Congress, e-Washington DC. Uhlafune okunengi okukhathaza isizwe, kanye lokuhle asekwenzile lokhu aqalayo ukukhokhela.
Abebandla lama-Democrats bamcome kakhulu u-Biden ngotshengisela ukuzwisisa kanye lolwazi kwezombusazwe; besithi usebambanise isizwe kulandela umbuso kowayengu Mongameli uMnu. Donald Trump, owatshiya kulokuxabana okukhulu phakathi kwezizalwane zaleli lizwe.
Uzulu we-Zimbabwe uthi kunengi okungafundwa embikweni oqakathekileyo owethulwe ngu-Mongameli Joe Biden wele Melika, ikakhulu inkuthazo yokuthi kumele abantu basebenze ndawonye ukwakha ilizwe labo kungakhathalekile ukuthi ngabebandla liphi lezombusazwe.
U-Biden uthi akula ngenye indlela ele Melika elingathuthuka ngayo ngaphandle kokuba abantu baleli lizwe babambisane kungelani lamabandla ezombusazwe abawasekelayo.
"Akula okusehlulayo. Abanye babe sithi ama-Democrats lama Republicans ngeke besebenze ndawonye. Kodwa lapha lalaphaya ama-Democrats lama Republics asebenza onke"
Amazwe ka-Biden lawa akhanya ethakazelelwe ngabanengi abe Zimbabwe abathi ukuze elabo ilizwe lithuthuke kumele wonke umuntu abambisane enhlelweni ezithuthukisa inhlalakahle kazulu wonke kungelani le bandla abalisekelayo.
Omunye walabo ngu Mnu. Gilbert Tshuma isakhamuzi se-Budiriro othi kumele amabandla ezombusazwe afunde kulokho okwenzakala e Melika esithi yiyo yodwa indlela engathuthukisa ilizwe.
“Kumele sifunde okunengi ngendlela abantu be Melika abasebenza ngayo. Yiyo yodwa indlela esingaqeda ngayo indubo esihlangana lazo njengelizwe. EMelika bayakwenza thina singehlukela njani”
Your browser doesn’t support HTML5
Udaba lwemibono kazulu we-Zimbabwe, ngeSOTU, esiluthulelwa nguMlondolozi Ndlovu.m4a
Kodwa abebandla lama-Republicans bona basole kakhulu umbuso wakhe, besithi, akulalutho olulesisindo alukhulumileyo. Baphe owabo umbono ngemva kwalumhlangano. Sizweni uNkosikazi Sarah Huckabee-Sanders, owebandla lama-Republicans, owake waba yisikhulumeli sikaMnu. Trump, osengusibalukhulu wesabelo se-Arkansas.
Your browser doesn’t support HTML5
Umbiko ka Nkosikazi Sarah Huckabee-Sanders echothoza inkulumo ye-SOTU eka-Mongameli Joseph Biden.m4a
Ukucubungula okukhulunywe nguNkosikazi Huckabee Sanders, iStudio 7 ixoxe loMnu. Busani Ntini, isizalwane se-Zimbabwe ohlala e-Buffalo, esigabeni se-New York.
Your browser doesn’t support HTML5
Ingxoxo loMnu. Busani Ntini ngokuchothozwa kombiko weSOTU ngabebandla lamaRepublicans
Esinye njalo isizalwane se-Zimbabwe uMnu. Mkhululi Ndabambi, ohlala e-Indiana khonapha e-Melika, laye usiphe owakhe umbono ngenkulumo kaMongameli Biden.
Your browser doesn’t support HTML5
Ingxoxo loMnu. Mkhululi Ndabambi ngenkulumo kaMongameli Joseph Biden eye-SOTU.m4a