Athobelene amaqembu omdlalo kakhilikithi; athi eleZimbabwe kanye leleWest Indies. Lamaqembu azadibana kumidlalo emibili eyohlobo lwe-Test, ezaqhutshelwa edolobheni lakoBulawayo.
Ukaputeni weqembu le-Zimbabwe u-Craig Ervine, uthi iqembu le-Zimbabwe lilabadlali abambalwa abangekhoyo ngoba belimele. Kodwa ulethemba elokuba labo ababizwe ukuzokuba yingxenye yeqembu bazadlala kuhle.
“Kusobala ukuba iqembu lethu liyaqhula, ngoba silabadlali abalimeleyo. Kodwa ngokubona kwami, abadlali ababizwe ukuzothatha indawo yabo batshengise ikhono labo kumncintiswano edlalwa lapha ekhaya ebalisa owe-Logan Cup. Silungiselele kakuhle kakhulu kuviki eyedluleyo, okokuthi wonke nje umdlali ulinde umdlalo ngamehlo abomvu,” kutsho u-Ervine.
Ocubungula umdlalo kakhilikithi u-Praise Dumi Dlakama, uthi yena ukaputeni u-Ervine, nguye okumele aliphakamise iqembu le-Zimbabwe ngoba ligcwele abadlali abasacathulayo.
“Esikukhangeleleyo yikuthi bazatshengisa yini ingqubekela phambili esiyibone ngesikhathi bedlala umdlalo wohlobo lwe-T20, le-One Day International.
Esesikubonile yikuba iqembu leli lilabadlali abanengi abasaqala ukudlala njalo ukaputeni u-Craig Ervine kanye lo-Gary Balance, yibo osekumele bathathe lelithuba ukuba bakhokhele, ngoba bengehluleka kuzakuba nzima kuqembu le-Chevrons,” kutsho uDlakama.
Abadlali abathenjiweyo abangasoze babe yingxenye yeqembu lesizwe kumidlalo le eqala ngoMgqibelo, ngababalisa u-Sikandar Raza kanye lo-Ryan Burl.
U-Ervine uqhubekele phambili wakhuthaza abalandeli bomdlalo kakhilikithi koBulawayo ukuba babuye ngobunengi babo, bezoxhasa iqembu le-Chevrons.
“Sithole usekelo olukhulu kabi ngesikhathi sidlala esigodlweni e-Harare. Kuyisifiso sami ukuba isimo somkhathi sibe ngesihle, ukuze abalandeli babuye ngobunengi babo." Kutsho u-Ervine
Ngiyakuthakazelela ukudlala koBulawayo, njalo labalandeli bengabe bengabanengi, njengalokho esikubona esigodlweni kodwa labo bayasikhuthaza kakhulu,” kutsho u-Ervine.
Amaqembu e-Zimbabwe lele-West Indies, azadibana kumidlalo emibili eyohlobo lwe-Test, njalo owokuqala ungoMgqibelo enkundleni ye-Queens Sports Club. Lumdlalo ukhangelelwe ukufika emaphethelweni ngoLwesithathu mhlaka-8 ka Nhlolanja.
Umdlalo wesibili wona uhlelwe ukuqala ngeSonto mhlaka-12 usiyafika komlindi uyacina ngoLwesine mhlaka-16 kuyonale inyanga.
SEE ALSO:
Udaba olumayelana lomdlalo wekhilikithi esilulethelwa nguJoseph Njanji