Harare......................
UMongameli Emmerson Mnangagwa uthi ukwethekelela kwele Zimbabwe, kukaMongameli Alexander Lukashenko wakwele Belarus, kuveza sobala isifiso esikhulu sokuqinisa ubudlelwano obuhle obuvele bukhona phakathi kwamazwe womabili.
UMongameli Mnangagwa ube ekhuluma ngemva kokulobelana izivumelwano ezithile zokuthuthukisa umnotho, lo Mongameli Lukashenko.
UMnangagwa uthe ukuza kuka Lukashenko kuleli kunikeza ilizwe injabulo njalo kuveza ukuba iBelarus ngempela izimisele ukuthuthukisa ele Zimbabwe.
“Ngithanda ukuthatha ithuba leli ukwazisa uzulu we Zimbabwe ukuba sithabe kakhulu ukuba sivakatshelwe kwele Zimbabwe”
UMnangagwa uqhubeke esithi ele Zimbabwe lele Belarus aphazanyiswa yizijeziso zomnotho ezabekwa ngamazwe angetshonalanga.
“Amazwe ange ntshonalanga ethesa amazwe ethu izijeziso zomnotho. Yikho sifuna ukuqinisa ubudlelwano bethu ukuze sinelise ukumelana lemigoqo edalwa yilezi zijeziso ukuthuthukisa umnotho wamazwe womabili”
Zimbabwe President Emmerson Mnangagwa with his Belarus counterpart, President Alexander Lukashenko
UMongameli Lukashenko uthe izijeziso zomnotho zabekelwa ele Zimbabwe ngodaba.
“Ukusethesa abakwena izijeziso zomnotho kwenza ukuba imnotho yethu ibuyele emuva okwamagama. Kodwa sizazama ngazo zonke indlela ukuba sibanjaniswe yibubi lobu okuyinto engekho emthethweni”
Ingcitshi kwezombusazwe uMnu Bekezela Gumbo uthi loba nje ubudlelwano phakathi kwamazwe lawa buqiniswa ele Zimbabwe kumele liqaphela ukuqilwa.
“Kumele ele Zimbabwe liqaphele ukusetshenziswa. Akulanto entsha ngobudlelwano lobu kodwa kumele sikhaliphe ngesikhathi sibhalelana phansi izivumelwano lezi”
Amazwe omabili lawa akhangelelwe ukulobela izivumelwano ezifika amatshumi amabili 20 kubudlelwano kwezokwemba, ezokulima lokunye. Okwamanje ele Zimbabwe selithole ama tractor limitshina yokuvuna ama combine Harvester. Ele Belarus lithi lizathatha okunye okukwenjiwayo kwele Zimbabwe libe selisipha ele Zimbabwe inzunzo.
ULukashenko wethekelela ele Zimbabwe okwensuku ezintathu.
Ubudlelwano phakathi kwamazwe lawa baqiniswa ngomnyaka ka 2015 ngesikhathi uMongameli Mnangagwa esesengu msekeli kowayenguMongameli ngaleso sikhathi umuyi uMnu. Robert Mugabe.
Ngomnyaka ka 2019 uMnangagwa wavakatshela kwele Belarus, lapho amazwe womabili alobelana izivumelwano uLukashenko wathembisa ukuvakatshela eHarare okuyisithembiso asifeze lonyaka. Kusukela ngalowo mnyaka amazwe lawa abe lokhu eqinisa lobu budlelwano ikakhulu kwezomnotho.
Kodwa ingcwethi ezicubungula ezomnotho zamukela lobu budlelwano zithandabuza ukuthi kambe lobu budlelwano buyanceda ngempela na ukuthuthukisa umnotho we Zimbabwe kumbe ele Belarus lizohuquluza nje inotho yaleli lizwe njengalokho okwenziwa ngamanye amazwe anjenge China okungalethi inguquko empilweni yabantu makhaza kunothiswa bona abasembusweni kuphela.
Your browser doesn’t support HTML5
Udaba lokwethekelela koMongameli weleBelarus eZimbabwe siluphiwa nguMlondolozi Ndlovu