Inhlanganiso ye-Southern Africa Development Community (SADC) iqhube umhlangano esigodlweni se-Windhoek kwele-Namibia namuhla. Injongo yalumhlangano ingeyokuhlaziya isimo sezombusazwe emazweni athlanganisela ele-Democratic Republic of Congo (DRC), eSwatini, kanye lase-Mozambique. Kodwa akuzange kukhulunywe ngele-Zimbabwe.
Umongameli Hage Geingob, wele-Namibia, ongumgcinisihlalo wohlangothi lwe-SADC Organ on Politics, Defence and Security nguye obize lumhlangano.
Umhlangano lo, ungenwa ngele-Zambia njengomgcisihlalo owe Troika, kanye lele-South Africa, elingumgcinisihlalo osanda kuphuma. I-SADC ithi ikhathezekile ngomumo kwele-DRC, eSwatini, kanye lase-Mozambique.
Ekhuluma ekusungulweni kwalo mhlangano, unobhalala jikelele we-SADC, uMnu. Elias Magosi, uthi kuqakathekile ukuthi kuqhutshwe umhlangano lo, ukuze kukhangelisiswe okwenzakala emhlubulweni wengeningizimu kwezwekazi le-Africa ngelihlo elibukhali .
"Kuqakathekile ukuthi sibambe lo mhlangano ukuze sihlaziye izehlakalo ezikhona emhlubulweni wethu ezilakho ukubuyisela muva esesikutholile njenge nhlanganiso.”
Noma nje umhlangano lo ukhangelane kakhulu lezehlakalo ze-DRC le-Mozambique, lapho okulenkinga zabomalwabecatsha, kanye le-Eswatini, lapho okusanda kubulawa igqwetha ebelilwela amalungelo oluntu, kulembono yokuthi ele-Zimbabwe lalo bekumele lifakwe kungxoxo zalumhlangano.
Umqondisi wenhlanganiso elwela ilungelo loluntu eye-Zambia Social Forum, uMnu. Gershom Kabaso, uthi kunengi okwenzakala emazweni angamalunga e-SADC okumele kuxazululwe.
Uthi ele-Zimbabwe bekumele libe ngelinye lamazwe obekumele afakwe ilihlo emhlanganweni wase-Windhoek.
“Kulokunga hlonitshwa kwelungelo loluntu kwele-Zimbabwe. Kunengi okungamanga kuhle e-Zimbabwe. Akubi kahle uma abalwela ilungelo loluntu bengavikelwa.”
Uthi ele-Zimbabwe njenge lizwe elizabamba ukhetho lonyaka, kumele libe sedabeni lwe-SADC, ikakhulu kulokwesabela ukuthi kuzakuba lodlakela.
Okungumbono egcizelelwe nguMnu. Effie Dlela Ncube oyingcwethi ecubungula ezombusazwe.
“Bekumele ukuthi ngabe i-Zimbabwe ikhona ku-agenda ye-SADC, ngoba kuqhubekwa kusephulwa ilungelo loluntu. I-Zimbabwe ihamba phambili kukho konke e-SADC, ngakho kumele ihlale ikhona ku-agenda ye-SADC kuze kulunge.”
UNcube ukhala ngokuthi i-SADC iphatha ele-Zimbabwe ngezandla ezibuthakathaka kumbe njalo bayalesaba.
"Sibona sonke isikhathi bengayiphathi ngendlela okumele baphathe ngayo i-Zimbabwe. I-SADC iyatotoza ele-Zimbabwe. Kulokwephulwa kwelungelo loluntu lokunye okungalunganga. "
Umhlangano walamuhla owe-Windhoek kade ukhangelelwe ukuphuma loluhlu lwezinqumo, phezu kwesimo sokungahlaliseki emazweni amathathu agoqela i-DRC, eSwathini le-Mozambique.
I-SADC ihlala njalo nje ichothozwa ngokwehluleka ukuthatha inyathelo eliqinileyo kumalunga ayo ayephula izinqumo zayo.
Your browser doesn’t support HTML5
Udaba Olumayelana Lomhlangano Womanyano we-SADC siluphiwa nguMqondisi Dube