Iqembu labesifazane abaleminyaka engaphansi kwetshumi lathoba munwemunye linqotshwe ngama-wickets alitshumi ngele Pakistan, emdlalweni walo owokucina kusibaya sika-Group B, kumncintiswano wezizwe zomhlaba oqhutshelwa kwele-South Africa.
Impumela yaNgoLwesine itsho ukuba iqembu le-Zimbabwe liphutshe imidlalo yalo lisemsileni wengalane ka-Group B, ngemva kokuba linqotshwe kuyo yonke imidlalo yomithathu.
Ocubungula umdlalo kakhilikithi uDumi Praise Dhlakama, uthi limpumela itshengisa ukuba, mhlawumbe iqembu leli belingalungiselelanga ngemfanelo.
“Bekungo kwakuqala ukuthi i-Zimbabwe ithumele iqembu labesifazane kumncintiswano wezizwe zomhlaba, owabadlali abaleminyaka engaphansi kwetshumi lathoba munwemunye. Lokhu sekungasetshenziswa njengembangela eyokuba yindaba singadlalanga kuhle, kodwa akutsho ukuba sibe sesinqotshwa ngamaqembu afana le-Rwanda. Kunengi okumele sikwenze kwelakusasa nxa sikhangelele ukuyadlala kumncintiswano efana lalo,” kutsho uDhlakama.
Olandela umdlalo kakhilikith, u-Kathryn Siziba uthi, bekuvele kungasoze kube lula kuqembu le-Zimbabwe, ngoba umdlalo wabesifazane ungadlalwa kumagumbi wonke elizwe.
”Lumdlalo kawukamemetheki ugcwale yonke indawo njalo khonokho kwenza ukuba kube nzima ukuthola abadlali abanengi abangalwisa ukuba yingxenye yeqembu elimela isizwe. Kumele inhlanganiso ye-Zimbabwe Cricket isebenzelane lezikolo, ukuze uqalwe ukudlalwa ezikolo zonke ngoba kungaba njalo lizakhula inani lamankazana awudlalayo.” Kutsho uSiziba.
UDhlakama uqhubekele phambili esithi, okuqakathekileyo yikuba kutholakale izifundo ngemva kokuphatheka kweqembu lamankazana kumncintiswano wezizwe zomhlaba.
“Abayenzanga kuhle nxa ukhangela ukuba emdlalweni we-Rwanda yikho lapho ebesikhangelele khona ukubalathi silethuba elokuthi sinqobe kodwa lakho kasisaphumelelanga ukunqoba. Lokhu kudala umbuzo phezu kokuba sihambise njani iqembu leli lingalungelanga ukuyancintisa, kodwa nxa sikhangela ikusasa yomdlalo, kuhle ukuba siphatheke kulumncintiswano ngoba efunde okunengi amankazana,” kutsho uDhlakama.
Ngokwakuqala ukuba inhlanganiso ye-International Cricket Council iqhube imidlalo yezizwe zomhlaba kuncintisana amaqembu abesifazane aleminyaka engaphansi kwetshumi lathoba munwemunye.
Iqembu le-Zimbabwe linqotshwe ngele-England ngama-runs angu-174 emdlalweni walo wakuqala: Kwathi emdlalweni wesibili, linqotshwe ngama -uns angu-39 ngele-Rwanda.
Your browser doesn’t support HTML5
Udaba lomdlalo wekilikithi yabesifazana siluphiwa nguJoseph Njanji