Bulawayo..................
Ingcwethi zezempilakahle ezeZimbabwe zikhuthaza uzulu ukuba aqhubeke elondoloza ukuhlanzeka zikhathi zonke ukuze azivikele ekubambeni umkhuhlane oweCholera ovame ukuhlasela inengi ngesikhathi sezulu.
Ekhuluma loMsakazo woStudio 7, uSikhwicamfumdo Solwayo Ngwenya ukhuthaze uzulu ukuba ananzelele ukuhlanzeka ngesikhathi sezulu ngoba kuvame ukuba lomkhuhlane wesihudo oweCholera ovame ukubakhona ngesikhathi sezulu abantu bengadla kumbe ukunatha amanzi angahlanzekanga.
“Isihudo seCholera asikhethi ukuthi sihlasela bani ezweni sivame ukubakhona ngesikhathi sezulu.”
USikhwicamfundo Ngwenya uqhubekele phambili ethi abantu bayachwayiswa ukugeza izandla lokunatha amanzi ahlanzekileyo zikhathi zonke.
“Sikhuthaza abantu ukuthi bahlale behlanzekile bebilise amanzi bengakawanathi lokupheka ukudla kuvuthwe zikhathi zonke.”
ICholera yisihudo esibi njalo silakho ukuthatha umphefumulo womuntu, kutsho uSikhwicamfundo Ngwenya.
“ICholera ingaphuzelwa ukwelatshwa iyabulala banengi asebalahlekelwa yimpilo ngemva kokuhlaselwa yisihudo lesi.”
Inengi elihlaselwa yisihudo seCholera bagijinyiswa yisisu bekhupha ingcekeza engamanzi lamehlo ayawela.
lnengi edolobheni lakoBulawayo lihlalele evalweni kulandela ukuhamba kwamanzi lokudubuka kwempompi ezithwala amanzi engcekeza aphuma zambuzini.
UNkosazana Nokuthaba Nyathi uthi ngabe ikhansili iyehlisa amalanga okubavalela amanzi lokulungisa masinya impompi zengcekeza ezidubukayo.
“Amanzi ahlanzekileyo asisawatholi malanga onke njalo lempompi zesewage sezihlala zidubukile osekufaka impilo zethu engozini iCholera ingahlasela silibele”
UMqondisi wezempilalahle koBulawayo uDokotela Maphios Siamuchembu uthi benza konke okusemandleni abo ukuba kungaqhamuki isihudo lobanje sihlasele kumazwe angomakhelwane.
“Umuntu engazibona esekhupha ingcekeza engathi ngamanzi amapheke irice kahle agijimele esibhedlela ayethola ukwelatshwa kusasemasinya ngoba iCholera iyabulala ungaphuza ukuthola usizo.”
UMnu Ncube uqhubekele phambili ekhuthaza abantu ukuba bengazibona belezibonele zesihudo bagijimele ekilinika bayethola usizo.
“Akhona amajekiseni lamaphilisi okwelapha iCholera kodwa kuhle uma uwaphiwa ngabezempilakahle njalo lawe ulakho ukuhle uzilungisele amanzi esawudo letshukela usasengekhaya usagijimela esibhedlela lapho okuyabe kulabodokotela labongi bakuphe idrip ukuze ubuyisele amanzi ayabe elahleke emzimbeni kusasemasinya.”
Umkhuhlane wesihudo uvele uludubo hatshi koBulawayo kuphela kodwa lakwamaye amadolobho elizweni jikelele lasemaphandleni.
Isihudo eseCholera sabulala abantu abedlula amakhulu amane ngomnyaka ka 2008 kusiya ku2009 kuthi ababanjwa yilumkhuhlane babesedlula inkulungwane ezilikhulu-100,000.
Ngomnyaka ka2018 kusiya ku2019 iCholera yabulala abantu abafika kumatshumi phose ayisikhombisa.
Your browser doesn’t support HTML5
Udaba lokulimuka isihudo seCholera siluphiwa nguAnnahstacia Ndlovu. mp3