MARYLAND - Bafuthelene abantu eZimbabwe kulandela ukutshaywa babuhlungu kwamalunga ebandla leCitizens Coalition for Change ngabacatshangelwa ukuba bakubandla leZanu PF.
Ibandla elibusayo lithi kalazi lutho ngabatshaye abantu abambalwa eMurehwa abatholakale besemhlanganweni webandla leCCC.
Bazonde bagan’unwabu abakumabandla aphikisayo abathi ukutshaywa kwamalunga eCCC kuveza ukuba akusalandelwa imithetho yelizwe ngesikhathi kulungiselelwa ukhetho olukhulu oluzakwenziwa eZimbabwe lonyaka. UMnu. Witness Dube, obona ngokwethulwa kwemibiko kubandla leMDC-T, uthi uhulumende kaMongameli Emmerson Mnangagwa kalandeli imithetho yelizwe.
UDube uthi kuzaxokozela okumangalisayo eZimbabwe ngesikhathi sokhetho.
Lokhu kusekelwa nguMnu. Effie Dlela Ncube, ingcwethi kwezombusazwe ezimeleyo.
Kodwa abakubandla leZanu PF bathi abazi lutho ngabantu abatshaye kabuhlungu amalunga eCCC. Omunye wabo nguMnu. Joseph Tshuma, okudale leZanu PF Central Committee.
UTshuma uthi kuyamangalisa okwenziwe ngabatshaye amalunga eCCC.
Loba bephika abakubandla leZanu PF, inengi labaphikisayo bathi konke lokhu kuveza ukuba uhulumende kaMnangagwa ufana xathu lokamuyi uRobert Mugabe. Bathi amalunga ebandla leZanu PF kawavumi ukuba akhahlameza uzulu loba engabanjwa xhaka ekwenza.