JOHANNESBURG - Uhlobo olutsha lweCovid-19 variant olumemetheka ngesiqhubu esikhulu okwedlula zonke esezike zaba khona olusanda kutholakala kweleSouth Africa selutshiye abeZimbabwe bethukile besesabela ukuvalwa kwamabhizimusi okungatshabalalisa imisebenzi yabo lenhlelo zokuziphilisa abasele lazo.
Ngokutsho kombiko owethulwe kukhasi leTwitter yinhloko yenhlanganiso yeStellenbosch University Network for Genomics Survellance in South Africa, uMnu. Tulio de Oliveira, uthi iXBB.1.5 variant ememetheka okwelangabi isingenile eMzansi.
UOliveira uthe itholakale egazini abalihlole mhlaka 27 Mpalakazi.
Ngokutsho kwenhlanganiso yezempilakahle emhlabeni jikelele eyeWorld Health Organisation, iXBB.1.5 luhlobo lweCovid-19 olumemetheka okwedlula yonke imihlobo esike yabakhona. Okwakhathesi akukabi khona umehluko omkhulu osuthe wabonakala phakathi kwemikhuhlane, lezimfa ezibangelwa yiXBB.1.5 nxa kuqathaniswa lezinye ezibekhona.
Lesi simemezelo sesitshiye ukukhathazeka kunengi lezizalwane zeZimbabwe kweleSouth Africa abasanda kubuyela emisebenzini bevela ekhaya lapho abadle khona ikhisimusi lomnyaka omutsha lezihlobo labangane.
UMnu. Jonathan Mbedzi
Isizalwane seZimbabwe, uMnu. Jonathan Mbedzi, uthi besabela ukuthi nxa kungabuye kuvalwe ukuhamba lamabhizimusi imisetshenzana abaselelayo izaphela du.
"Kuzobanzima ebantwini ngoba besesingani sibangconywana sesihluma kancane. imisebenzi ibisingathi iyavela eminye. Kodwa nxa sekunje sekuzakwenza again ukuthi kube nalezizinto zokuthi eminye imisebenzi kuyavalwa abantu simiswe imisebenzi."
Le yinto egcizelelwa ngesinye isizalwane seZimbabwe, uKhulekani Dube.
UMnu. Khulekani Dube
"Kuyethusa kakhulu lokhu esikuzwayo ngoba yebo besesidlulile ngokwesikhathi but ngokokuphila besingakedluli ngoba umonakalo ube mkhulu kakhulu odaleke ngale icovid edlulile, so nxa kusabuya enye engaphezukwayo kutsho ukuthi ukuphila kuyaba lukhuni kakhulu ngoba amankampani amanengi avalile ngalo umkhuhlane wakuqala, imisebenzi eminengi yabaphelela abantu. So, ma kusiza okungaphezu kwalokhu kutsho ukuthi idamage yakhona ibankulu kakhulu."
Abanye bathi njengoba inengi labeZimbabwe kungabantu abazisebenzayo ikakhulu abathengisa ezitaladeni lemisikeni bangathwala amagabha avuzayo nxa kungethulwa imigoqo eyabakhona ngo 2020.
Kusenjalo ugatsha lwezempilakahle kweleSouth Africa seluxwayise abangakahlabi amajekiseni okuvikela icorona ukuthi benze njalo ngesikhathi kusadingisiswa okunengi ngegciwane leXBB.1.5 variant.
Isiphathamandla senhlanganiso yeSouth African Medical Association, uDokotela Mvuyisi Mzukwa, uthi okwakhathesi akukho okufuze kwethuse umphakathi kakhulu ngaloluhlobo lweCOVID-19.
"Esingakwenza kuphela yikuthi siqaphele sizivikele ngoba osolwazi baphakathi kokucwaninga ngaleligciwane. Okuthabisayo yikuthi elikabi lembali yokulalisa abantu abanengi ezibhedlela."
Ngesikhathi kuhlasela icoronavirsu ngo 2020, inengi lezizalwane zeZimbabwe abasebenza endaweni zokudlela, ezokwakha lokuthengisa ezitaladeni balahlekelwa yimisebenzi njengo konke kwavalwa impilo yema khwimilili.
Kodwa-ke kusukela kwesulwe yonke imigoqo yokwenqabela icoronavirus ekuqaleni komnyaka ophelileyo, inengi lemisebenzile ibisihluma njalo.
Okwakhathesi iXBB.1.5 isitholakale emazweni angamatshumi amabili lasitshiyagalombili (28).
Kusenjalo, uSikhwicamfundo Solwayo Ngwenya, ingcwethi kwezempilakahle, uthi abantu eZimbabwe kumele beqaphele umkhakha omutsha oweCOVID-19, obizwa ngokuthi yi-XBB.1.5, omemetheka okwedlula yonke imikhakha.
UNgwenya uthi umkhakha lo ulakho ukubulala abantu abangazivikeli kugciwane leCOVID-19.
Abantu abafika phose amakhulu amabili lamatshumi ayisithupha - 259,981 sebahlolwa batholakala belegciwane leCOVID-19 selokhu umkhuhlane lo waqhamuka eZimbabwe.
Umkhuhlane lo usubulele abedlula inkulungwane ezinhlanu – 5,632 elizweni.