EleZimbabwe limanyene lamazwe omhlaba ngoLwesithathu ekunanzeni usuku lokusetshenziswa kwe-braille besithi bafuna kwenziwe iphepha lokuvota elisebenzisa ibraille.
Abakhubazekileyo emehlweni bathi lanxa lelilanga liqakathekile empilweni zabo, balangazelela ukuba i-braille isetshenziswe ezikolo, ezibhedlela lakukhetho; olukhangelelwe ukwenziwa lonyaka.
I-Braille ingafinyelelwa kwezinye indawo lapho abaphila khona; abakhubazekileyo emehlweni bathi bakhangelele uhulumende ukuthi athathe amanyathelo aqinileyo okubona ukuthi amalungelo abo ayalondolozwa ikakhulu lonyaka ilizwe lilungiselela ukhetho.
UNkosikazi Urndia Ngwenya
UNkosikazi Urndia Ngwenya omela abakhubazekileyo e-Matabeleland South, uthi i-Braille iqakathekile ekuvoteni ngoba kungafezeka ilungelo labo lokuvota bekhululekile.
“Ngingathokoza kakhulu uma kukhetho oluzayo singavota kusebenza i-Braille, ngoba kuzagcwalisa kuhle ilungelo lami lokuvota okubayimfihlo yami ngedwa ngoba i-Braille iqakathekile kimi.”
Umbono kaMaNgwenya usekelwe nguMnu. John Jemwa okhubazekileyo emehlweni ongusomabhizimusi e-Nguboyenja.
“I-Braille iqakathekile empilweni yami njalo sikhangelele ukuba kukhetho oluzayo uhulumende agcwalise amalungelo ethu, sivote kusebenza i-Braille kukhetho oluzayo.”
FILE: Omunye wabavota ngomnyaka ka2018
Isakhamuzi sakoBulawayo, uNkosikazi Juliet Phiriyena uthi kuqakathekile ukugcwalisa ilungelo labakhubazekileyo endlebeni lemehlweni. “Siphila labantu abakhubazekileyo, ngakho kuqakathekile ukuba amalungelo abo labo ahlonitshwe, njalo bafundiswe kusaselesikhathi ukuthi bazavota njani nge-Braille.”
U-Senator Ishmael Zhou omela abakhubazekileyo edale lephalamende, uthi ukhangelele ukuba uhulumende ahlele i-Braille Authority of Zimbabwe, ukuze lokhetho oluzayo lusebenzise iBraille
“Edale lephalamende bayazama ukuhlonipha ilungelo lami, kodwa ngikhangelele ukuba uhulumende asungule inhlanganiso ye-Braille Authority of Zimbabwe, ukuze zonke izigaba zempilo itholakale, sonke siphile ngokulingeneyo, hatshi okwenzakala manje.”
Isiphathamandla esekhomishini ebona ngezokhetho ezweni, ko-Bulawayo, i-Zimbabwe Electoral Commission, esingathandanga ukubethwa ngegama, sithi bona njengekomishini bebengakaziswa ngokusebenza kwe-Braille kukhetho oluzayo.
Usuku lwe-Braille, lunanzwa minyaka yonke ngelanga lesinekuZibandlela emhlabeni jikelele: I-Braille isetshenziswa ngabakhubazekileyo emehlweni ekubaleni lokubhala. Lolusuku lwabakhona ngemva komkhankaso kamuyi u-Lous Braille we-France, owazalwa mhlaka 4 Zibandlela 1809 owayekhubazeke amehlo eleminyaka emithathu.
Abe-Jairos Jiri Association, efundisa abakhubazeke emzimbemi ngendlela ezehlukeneyo, bachaze ukuba lokhe besafundisa abakhubazeke emehlweni ukubala lokubhala i-Braille.