Ingcwethi ezicubungula ezomnotho zithi isilinganiso sokukhuphuka kwentengo yempahla siqansile okwamagama ngenyanga edluleyo kaMpalakazi, osokudale ukuba abathengi bakhonone ngesisindo seholo abathi siqhubeka sisehla. Okwakhathesi imali yendleko yomuntu oyedwa iphosa ibe ngamadola azinkulungwane ezingamatshumi amathathu amadola eZimbabwe (ZWL $29,219).
Ukhukhuphuka kwentengo yempahla emqoka empilweni yabantu yansuku zonke okulokhe kuqansa kubikwa kwengezelelwe yimpi ekhona emazweni athengisa amafutha ezimot a.
UMnu. Stevenson Dhlamini ingcwethi kwezomnotho njalo efundisa ekolitshini ele-National University of Science and Technology (NUST) uthi khathesi kusese masinyane ukuthi kwaziwe ukuthi kuzahamba njani njengoba amazwe abesilwa esekhulumisana.
"Siyananzelela ukuthi kube lokukhuphuka kwenzuzo esiyitholayo ngokuthengisa impahla zelizwe lethu kwamanye amazwe. Okumqoka yikuthi intengo yempahla ezifanilela oGold leCoal kukhuphukile umhlaba wonke okuyikho okukhuphule le nzuzo.Kumpahla esizithenga kwamanye amazwe sinanzelele ukuthi kukhuphukile njalo lokhe kwaqala ubudlwangundlwangu kukhuphuke yonke into emhlabeni jikelele. Kunzima ukuthi sihle sithi bhadla kodwa sikhangelele ukuthi kuzakuba ngcono ukukhuphuka kwentengo ngoba ngathi sokulokukhulumisana phakathi kwamazwe la ade ehlukumezana lenhlelo ezibekwe nguhulumende lokhu ebambe ukuthi kakhuphuli imali ebhodabodayo ku-economy yethu money supply."
UMnu. Effort Ncube umqondisi wenhlanganiso ebona ngamalungelo abathengi eye-National Consumer Rights Association, uthi ubuyanga buzaqhubeka bukhona elizweni ngoba kungeke kulunge khathesi.
"Wonke amazwe emhlabeni alenjongo yokuthi lokhu abakuthengisela ngaphandle esikuthi ngama exports kube kukhulu ukwedlula ama imports kungenzeka isikhathi eside kuba luncedo kakhulu kwezenotho kuqinise imali yelizwe kulethe lemsebenzi.Kusadingeka ukuthi kuphindaphinde kakhulu kulethe inguqhuko kwezenotho ,ukuthi kukhule kakhulu ama exports okwedlula ama imports kungabangelwa yikuthi kugcwele ubuyanga abantu bathenge okwangaphandle esikubona e-Zimbabwe i-inflation izaqhubeka ikhula ngoba ezemnotho azikami ngendlela efaneleyo."
UNkosikazi Mellisa Mathuthu uthi intengo yezinto ezimqoka ikhuphuka nsukuzonke okuyinto enzima njalo ebuhlungu.
"Inflation ayikaze isizwele njengabathengi ngoba nxa ngikhangela umumo okhona khathesi nxa sikhangele iback to school amaprice ayakhuphuka ngoba wonke umuntu ufuna ukuthi athole something .lntengo yento yonke emqoka iyakhuphuka njalo lemali edliwa ngumuntu oyedwa iliholo lomunye okuyinto enzima njalo ebuhlungu kakhulu."
UNkosikazi Sanele Nyoni ophila ngokuthengisa uthi bakhweze intengo zabo ikakhulu ngesikhathi sekhisimusi ngoba labo bebethola ikhuphukile lapho abawoda khona.
“Nxa sikhangele ukuthi i-business iqale ukuphakama ngo November sisiya kuDecember. Besesihlala njalo nje sigijima sisiya woda, lanxa kwesinye isikhathi besithola sekukhwelile. Yikho lathi okusenza sikweze ngapha, hatshi ukuthi siyadulisa ngo-December."
Inhlanganiso eye Zimbabwe National Statistics Agency ikhiphe umbiko ochaza ukuba ngenyanga kaLwezi impahla ezithengiselwe amanye amazwe zikhuphuke nesilinganiso phose esingamatshumi amathathu lanhlanu ekhulwini (34.7%) nxa kuqathaniswa lenyanga kaMfumfu. Kuthi ezithengwe kwamanye amazwe zingena e-Zimbabwe ngenyanga kaLwezi zikhuphuke ngesilinganiso esiphezu kokuhlanu ekhulwini (5.2%).
Your browser doesn’t support HTML5
Udaba lokukhuphuka kwentengo yempahla siluphiwa nguBathabile Masukump3