Ummeli we-Zengeza West edale lephalamende uMnu. Job Sikhala namhlanje ucele idale lika Mantshi ukuba intathelizindaba ziphiwe imvumo yokwethula konke okwenzakalayo emthethwandaba ngesikhathi ethoniswa kucala lakhe, i-Live streaming. USikhala uthonisiswa icala lokuphazamisa ukucutshungulwa kodaba lokubulawa kwelunga lebandla lakhe ele Citizens Coalition for Change, u-Moreblessing Ali, ngabantu abacatshangelwa ukuba ngabebandla le-ZANU PF.
Lisipha ubufakazi edale lika Mantshi, iqgwetha lika Sikhala uMnu. Jeremiah Bamu, uthe kuqakathekile ukuthi intathelizindaba zivunyelwe ukutshengisa lokho okwenzakala emthethwandaba ebulenjini be-internet ngesikhathi icala leli lithoniswa.
UBamu uthe izihlobo zika Sikhala ezigoqela labo abaphandle kwelizwe, lentathelizindaba eziphandle kwelizwe kanye lalabo abavotela uSikhala e-Zengeza West, bafuna ukwazi okwenzakala edale lomthethwandaba.
“Sifuna ukuba lokho okwenzakala edale kuphume ebulenjini be internet. Uhulumende uthi uzasitshela kusasa ukuba bazavumelanga lakho na. Udaba lolu luzaqhubeka kusasa”
Uphinde wathi indawo kamthethwandaba lapho okuthethwa khona loludaba kaweneli abantu bonke abafuna ukuba sedale, esithi amapholisa agcwele phandle esethusela abantu.
USikhala uthi ukukhitshwa ebulenjini kodaba lolu kuzanceda kakhulu ukuba amapholisa engathwali nzima ukuxotshanisana labantu. Umtshutshisi kudaba lolu, uMnu. George Monokore, uthi uhulumende uphikise isicelo sokuba udaba lolu luphume ebulenjini esithi bazakupha izizatho zabo kusasa.
Kusenjalo uBamu utshele umthethwandaba ukuba kabathokozi ngamaphepha ecala lika Sikhala, abawaphiwe kuviki edluleyo, icala seliqalile ukuthonisiswa.
“Basinikeze amaphepha lawa sesiqalile ukuphikisana lalokho okutshiyo nguhulumende. Sizabhala njalo enye incwadi sincenga ukuba idale lizwe udaba lolu.”
Udaba luka Sikhala luzabuyela emthethwandaba kusasa, uMnu. Bamu akhangelelwe ukuqhubeka ekhuluma ngodaba lolu okuzenza ukuba uMantshi aphe isinqumo sakhe.
Umsekeli wesikhulumeli se-CCC, uMnu. Gift Ostallos Siziba, uthi ibandla lakhe kalithokozi ukuba uSikhala usephose efike inyanga ezifika eziyisithupha esejele.
“Sile nkinga enkulu. Ngoba esikubone namhla kutshengisa ukuba kabafuni ukuzwisisa. Kusasa sizabuyela edale ukuba senelise ukuba udaba lolu lube ku-internet”
Uqhubeke esithi bazakwenza konke okusemandleni abo ukuba umhlaba wonke wazi ngokwenzakala ku SIkhala.
“Kufanele ukuba kusetshenziswe umsebenzi omkhulu ukuze uSIkhala aphume. Kumele wonke umuntu abe kwazi okwenzakalayo”
USikhala ukhangelele ukuthonisiswa olunye udaba lokubangela udlakela olwenzakala e Nyatsime kulandela ukubhubha kuka Moreblessing Ali yena owabulawa ngu Pius Jamba Mukandi yena ovuma icala lakhe.
Selokhe abotshwayo, uSikhala usefake izicelo ezifika ezilitshumi lambili emthethwandaba, zokuthi aphiwe imvumo yokuhlawulela isibambiso ese-bail ukuze athonisiswe esuka ngekhaya, kodwa kukhanya kuyehlula.
Your browser doesn’t support HTML5
Udaba lukaSikhala ofuna athonisiswe kuphuma kuLivestreaming siliphiwa nguMlondolozi Ndlovu