Harare..........
Uhulumende we Zimbabwe usekhiphile umthetho obuvimba abezimota ezincane loba amakhombi ukuthwala abantu, osokusitsho ukuba amabhasi awe ZUPCO aseyiwo wodwa asevunyelwa ukuthwala abantu. UMlondolozi Ndlovu usethulela loludaba ngokugcweleyo.
Lokhu kuza ngemva kokuba ele Zimbabwe ngo Mbimbitho ka 2020 labeka umthetho lo emizameni yokumelana lobhubhane lwe Covid-19 owawusithi zonke imota zimiswe ukuhamba ngaphandle kwamabhasi awe ZUPCOkuphela.
Loba nje lokhu kwakusenzelwa ukumiswa kokusabalala kobhubhani lwe Covid-19 abantu bathwala nzima ngoba kwakungasela ndlela zokuhamba.
Kodwa uhulumende wethule umthetho owe Statutory Instrument (SI) 213A othi izimota zonke sezivunyelwa ukuthwala abantu nxa zibhalisiwe okusemthethweniukuqhuba lumsebenzi.
Inhlanganiso emele labo abahamba ngezimota eye Passanger Association of Zimbabwe (PAZ) yamukele ngenjabulo inyathelo elithethwe ngu hulumende leli isithi uzulu udinga indlela ezinengi zokumba ikakhulu nge khefu lekhisimusi.
Umholi we nhlanganiso leyi uMnu Tafadzwa Goliathi esithi udubo olukhona ngamabhasi awe ZUPCO yikuba abe engaseneli emalokitshini onke obe sekusenza ukuba uzulu athwale nzima.
“Siyathaba ngesinqumo esithethwe ngu hulumende. Sikhuthaza labo abahamba ngezimota ukuba bengabeki izimali zaphezulu kodwa bebeke imali ezihambelana lozulu”
Uqhubeke esithi kumele uhulumende abone ukuba imota ezihamba emgwaqweni zilamaphepha eneleyo.
“Sithi thina abamakhombi kumele belandele umthetho. Njenge PAZ sifuna ukuba kulandelwe umthetho emgwaqweni endaweni zonke ze Zimbabwe”
Isikhulumeli samapholisa uMnu Paul Nyathi uthi amapholisa azakwenza konke okusemandleni awo langendlela zonke ukubona ukuba imota ezihamba emigwaqweni zibe ngezilamaphepha eneleyo.
“Sifuna ukwazisa uzulu we Zimbabwe ukuba izimota zonke ezihamba emigwaqweni zibe ngizibhaliswe emthethweni. Kumele abantu abatshayela izimota beqaphele lapho behamba emigwaqweni”
Isikhathi sekhefu senza ukuba abantu abanengi bedinge indlela zokuhambisa ezigoqela amabhasi lezitimela ukuze benelise ukuyadlalela iKhisimusi bendawonye lemuli zabo endaweni ezitshiyeneyo zelizwe okugoqela emaphandleni lasemadolobheni.
Amapholisa aphinde akhipha isixwayiso sokuba abezimotha labamabhasi batshayele ngonanzelelo emigwaqweni belandela zonke iziqondiso zokuhamba emigwaqweni ezigoqela ukungagijimi ngesiqhubu esiyingozi, ukutshayela umuntu enathile leminye. Amapholisa athi njalo kusukisela ngoMgqibelo owedluleyo sokufe abantu abaphose bafike amatshumi amathathu ngengozi zomgwaqo okugoqela izimotha lamabhasi.