Inkampanii zikaloliwe yakweleZimbabwe leBotswana sezilobelene isivumelwano sokuthi izitimela zivunyelwe ukungena emazweni womabili ukuyatshiya imphahla endaweni ezitshiyeneyo.
Isivumelwano lesi sikhangelelwe ukuthuthukisa ibhizimusi kaloliwe phakathi kwamazwe womabili.
Isitimela esivela eBotswana besiphelela ePlumtree, lapho ekade sihlangana leseZimbabwe khona, kodwa khathesi sesizavunyelwa ukungena size siyefika eFrancistown, kukanti eseBotswana sizayafika koBulawayo.
Abaqondisi bamankampani awe National Railways of Zimbabwe (NRZ) le Botswana Railways (BR) balobe isivumelwano lesi ngoLwesihlanu edolobheni leFrancistown.
Usibalukhulu we NRZ, unkosazana Respina Zinyanduko uthi isivumelwano lesi sitsho ukuthi sekuzaba lenguquko ekuhambiseni imphahla masinya phakathi kwamazwe womabili. Eyinye imphahla iyakwamanye amazwe afana leMozambique, South Africa, Democratic Republic of Congo kanye leZambia.
“Isivumelwano lesi sitsho ukuthi izitimela sezingena phakathi emazweni womabili. Silamakhastoma afanayo phakathi kwamazwe womabili, njalo lesisivumelwano sizaphathisa ekuthuthikiseni indlela esiyenza ngayo ibhizimusi.”
Usibalukhulu kugatsha olubona ngezokuhambisa kweleBotswana, umnunzana Orapeleng Mosigi uthi inhloso yesivumelwano yikuzama ukuphucukisa ukuhamba kwezitimela phakathi kwamazwe womabili.
“Imthetho yobudlelwano eAfrica iyakhuthaza lokhu esikwenzayo. Okuqakathekileyo yikuthuthukisa ibhizimusi lokuhamba kwemphahla ngenjanji.”
Isivumelwano lesi silotshwa ngesikhathi isimo esibi somnotho kweleZimbabwe sidala ukuthi isitimela esivela eBotswana siqede amalanga silinde ukuntshintshana lesaseZimbabwe ePlumtree.
Zimbabwe/Botswana Railways Agreement
Lokhu kudalwa yikuguga kwezipolo kanye leyinye imtshina kaloliwe, kungela mali yokuguqula isimo.
Ocubungula ngezombusazwe umnunzana Dumisani Nkomo uthi lesi yisivumelwano esihle kodwa esithi uyesabela ukuthi imitshina kalolilwe eZimbabwe ayikho kusimo esihle.
“Yinto enhle kodwa kungaphambaniseka uma sikhangele injanji zethu ukuthi okunengi sekukudala. Kodwa yinto ebukekayo kumnotho welizwe uma singaguqula ukusebenza kwenjanji yethu.”
Umnunzana Cephas Tshuma, owenhlanganiso yeZimbabwe Diaspora Community ekweleBotswana utsho imbono yakhe phezu kwalesi sivumelwano.
“Isivumelwano sihle ikakhulu uma usikhangele kulabo abalindele imphahla. Kuzaba lula ukuthi imphahla le ifike ngesikhathi. IBotswana yona elezitimela eziqinileyo kutsho kuzayihambela ngcono ngakucele laso.
IBotswana ihambisa kakhulu isawudo kanye lamalahle ecoal, amanye esiya emazweni afana leMozambique.
Zimbabwe/Botswana Railways Agreement
EleZimbabwe lalo lilamakhastoma athenga amalahle ecoal kweleSouth Africa.
Kodwa ukuguga kwensimbi zikaloliwe sekubuyisele emuva ibhizimusi leNRZ, sokwamiswa lokuhamba kwesitimela esithwala abantu phakathi kweBotswana leZimbabwe.