Inhlanganiso yabosomabhizimusi, eye Zimbabwe National Chamber of Commerce iveza ukuba ithemba labosomabhizimusi selehlile nxa kuqathaniswa lomnyaka odlulileyo. Ingcosana yabantu abalitshumi lanhlanu ekhulwini (15%) babone umnotho welizwe wenze kuhle lonyaka. Osomabhizimusi abayisilinganiso phose esingamatshumi ayisithupha ekhululwini (59%) bathi bakhangelele ukuba umnotho welizwe uzakwehla, kuthi abalitshumi lasitshiyagalombili ekhulwini (18%) balethemba lokuba umnotho welizwe ungenza kuhle ngomnyaka ozayo oka 2023.
Imbangela yokuthandabuza kwabosomabhizimusi kungenxa yokuba kuyaqhutshwa ukhetho ngomnyaka ozayo, kanye lesinqumo sikahulumende sokuba kuzaqhubeka ukusetshenziswa kwemali yeZimbabwe ndawonye lezakwamanye amazwe.
Ithemba labathengi lalo likhangelelwe ukuba lizakwehla okwamagama, okwengezelela ukuthandabuza kwalabo abaqhuba amabhizimusi.
Umnunzana Thabo Ndlovu ingcwethi ecubungula ezomnotho uthi inengi labosomabhizimusi lizakhuphula intengo bekhangelele ukuthi isisindo sedola leMelika sizakwehla.
"Sisiya kuma elections vele ibusiness sense ye government is expected to decline ukuthi singa booster iconfidence khathesi mbona angazathi sekukhatshana kakhulu.Ngabe by now I currency yethu sistable osolusenzakala khathesi osomabhizimusi sebeqalisile ukucabanga lokuprizer way above bekhangelele ukuthi irate izakuwa."
Umnunzana Mbongeni Mathuthu usomabhizimusi wako Bulawayo uthi inengi labantu seliqakathekisa ukubhadalela indleko zokufundisa abantwababo.
"Umumo womnotho ngalesi isikhathi uyadanisa kakhulu lokhu sikubona ngamacustomer esijwayele ukuba lawo ngalesi isikhathi somnyaka angezeleleke okuphindiweyo. Sikhangele ukuthi okwenzakalayo khathesi abanengi sebeqhakathekisa izinto ezimqoka ezinjengezikolo zabantwana okungangokuthi ibusiness iyehlile. Sikhangelele ukuthi sisiya kukhetho kumnyaka ozayo abantu bazabe begcina imali zabo kulokuthi bathenge impahla abangela qiniso lazo."
Umnunzana Dumisani Nkomo umqondisi weHabakkuk Trust njalo eyingcwethi ecubungula ezombusazwe uthi imithetho eminengi efakelwa osomabhizimusi yiyo eyenza kubenzima ukuthi basebenze.
“Ukungabi lethemba kubangwa yikuthi kulemthetho eminengi kakhulu enqabela osomabhizimusi ukuba besebenze kuhle.Uyathola ukuthi kule Zimra le Nassa kubanzima le political invironment kuhlala kusiba lemithetho eminenginengi etshintshayo kunzima ukuthi amabhizimusi akhule kuhle."
Umnunzana Effort Ncube umqondisi weNational Consumer Rights Association uthi osomabhizimusi abathembi ukuthi uhulumende engavusa umnotho welizwe.
“Ukuthi isimo somnotho sizahamba njani sikhangela insuku ezidluleyo leminyaka edlulileyo. Umnotho awuphathwanga ngendlela efaneleyo ngakho ke abezamabhizimusi bayakubona ngoba ithemba labo lizaguqhuka kumbe izinto ezinengi zizaguqhuka.Kuveza kahle kamhlophe lokhu kuyikho okuhlupha abantu beZimbabwe ukungathembi uhulumende ukuthi angavusa ilizwe lezomnotho."
Umphathintambo wezemali umnumzana Mthuli Ncube esethula uluhlu lwendleko lokubuthaniswa kwemali kahulumende lomnyaka ozayo uchaze ukuba kukhangelelwe ukuthuthukiswa ukusebenza kwamabhizimusi. Lokhu kukhangelelwe ukuba kukhuthaze ukuba uzulu abelethemba njalo anelisa ukuba lemali ayigcina ebhanga njalo kwakhiwe ithemba elizadala ukuba kufakwe imali elizweni ezakhulisa umnotho welizwe. Wengeza ngokuba imithetho eye fiscal ndawonye leye Monetary Policy ikhangelelwe ukhwehlisa izinga lokukhuphuka kwentengo yempahla kanye lelokwehlisa ukuwa kwesisindo semali yakulile nxa iqathaniswa leyangaphandle kwelizwe.