Ibandla leMovement for Democratic Change namuhla lenze umhlangano walo omkhulu oweCongress lapho amalunga alo akhethe ukuba uMnu. Douglas Mwonzora ukuthi aqhubekele phambili engumongameli walo.
Akulamuntu ophikise kumbe obencintisana loMwonzora kukhetho lukamongameli kulandela ukwehlulela kuka Mnu. Morgan Komichi loMnu. Elias Mudzuri abaswela ukukhethwa ngamalunga abo ukuze bengene kukhetho lolu.
UMwonzora utshele amalunga ebandla leli eHarare City Sports Center ukuba bazancintisa kukhetho oluzakwenziwa ngomnyaka ozayo. Uthe bazanqoba kukhetho lolu.
Esethula impumela yokhetho lwebandla leli, umgcinisihlalo wogatsha olubona ngezokhetho, uMnu. Thomas Masvingo, uveze ukuba uMwonzora nguye onqobileyo.
UMasvingo uthe abazancedisana loMwonzora emsebenzbini wakhe nguMnu. Chief Ndlovu, ozakuba ngumsekeli wakuqala, loNkosikazi Pauline Mpariwa, osengumsekeli wesibili.
Ekhuluma emhlanganweni lo, uMwonzora uthe umhlangano wabo namuhla utshengise ukuba ibandla lakhe liqine saka.
Kodwa omunye osekala ibandla leli, uMnu. Silas Zakeu, uthi ibandla leMDC-T seliphazanyiswa ngabantu abathanda imali.
UMnu. Elias Mudzuri, owayefisa ukuba ngumkhokheli webandla leli, kakhethwanga nguzulu kusalungiselelwa umhlangano weCongress lomunye wakhe uMnu. Morgen Komichi. UMudzuri kabuyanga emhlanganweni lo.
UMnu. Solomon Chikwero nguye osebambe isikhundla somgcinisihlalo webandla leli ebesiphethwe nguKomichi. Uzasekelwa nguNkosazana Yvonne Musarurwa.
SEE ALSO:
Udaba Esilethulelwe NguMlondolozi Ndlovu