Ibandla le-African National Congress lisebunzimeni obukhulu ngengxabano, lokudonselana okuqhubekela phambili kunkokheli yebandla leli.
Ngolwesine, inhlanganiso eyowayengu Mongameli welizwe, uMnu. Jacob Zuma, iJacob G. Zuma Foundation, ikhiphe umbiko kunkundla yokuxhumana eye-Twitter, othi uZuma usemangalele uMongameli Ramaphosa emthethwandaba, ngakuthi ngamacala aphatheka kiwo edalwe ngabanye, abagoqela igqwetha uAdvocate Downer.
UDowner laye wamangalelwa nguMnu. Zuma emethesa icala lokukhipha ingwalo zakhe zokwelatshwa mgceke, ngesikhathi lapho uZuma ayesetheswa icala lokwenza isivumelwano sezikhali esasingekho ethethweni. UDowner yena wayengumtshutshisi kumacala ayesetheswa uZuma ngalesosikhathi.
Ngomthetho wele-South Africa, noma yisiphi isizalwane sakulelo, silelungelo lokumangalela ukutshutshiswa kwangasese, kwalowo esimcabengela ukuba ulecala okumele aliphendule phambi kukamthethwandaba.
Incwadi le ithi umsolwa uMnu. Ramaphosa kufanele abuye phambili kukamthethwandaba ophezulu, owe-Johannesburg High Court, mhlaka 19 kaZibandlela 2023.
Konke lokhu kwenzakala ngesikhathi ikhongolosi yamatshumi amahlanu lanhlanu - 55th eyebandla le-ANC isungulwe ngoLwesihlanu eJohannesburg Expo Center e-Nasrec, eGauteng.