Abohlangothi olulawula ezemihloliso elizweni olwe Zimbabwe School Examinations Council, batshele idale lephalamende ukuba ukuqilwa kwemihloliso yesibanga seOrdinary Level lonyaka kusabalale elizweni lonke.
I Zimsec ithi kulabangamakhulu phose ayisithupha- 588 ababanjwe beqila emihlolisweni. Lolu hlangothi luthi luyayaqhubeka lucubungula ukuqilwa kwemihloliso ngakhoke kayilaqiniso ukuba impumela yemihlolise ka ‘O’ level izakwethulwa nini.
Esipha ubufakazi phambi kwekomidi yedale lephalamende ebona ngezemfundo umsekeli womholi we ZIMSEC uMnu Farai Zisengwe uthi uphenyo lokuqilwa kwemihloliso luqhubekela phambili njalo kulabantwana abanengi abakhangelelwe ukubanjwa ukuba baqila.
UMnu Zisengwe uthi impumela yemihloliso ye Advanced Level izaziswa ngo Zibandlela womnyaka ozayo, kodwa eye O level ayazakali ukuba izaphuma nini esithi izaziswa nxa sebegqibe uphenyo lwabo.
Uqhubeke esithi indlela abamaka ngayo imihloliso yenza kube lula ukuba babe kwazi ukuba ngobani oqilileyo ku mihloliso.
IZIMSEC ithi balolwazi abalalo lwakulezi nsuku olwe Mulpractice Detection Tool, olubatshengisa ukuba umuntu uqilile emihlolisweni loba hatshi.
Uthi bonke abantu abaqila emihlolisweni kabaphiwa miklomelo njalo bazamiswa ukuloba imihloliso okweminyaka emibili.
Iqhubeke esithi udubo abahlangana lalo ngolukuba abantwana babanjwa beqila emihlolisweni sebephikisa impumela leyi behambisa iZIMSEC emthethwandaba.
Omunye umzali uMnu Ronald Mlilo utshengise ukungajabuleli inyathelo labeZIMSEC esithi bona yibo abalobutshapha.
Omunye njalo umzali uMnu Liberty Sibindi usole iZIMSEC ngokuqilwa kwemihloliso lokhu.
Kodwa uMnu Zisengwe uthi iZIMSEC kayila okwaneleyo okokusebenzisa ukuvimba imikhuba yokuqila. Uthi lokhu sekwenze ukuba bazadinga usizo kubabalisi lakuzulu wonke ukuze udubo lokuqilwa kwemihloliso luqedwe.
Kulendawo ezifika inkulungwane lengxenye 2500 ezilotshelwa imihloliso ye O level kodwa iZIMSEC ilezisebenzi ezingamatshumi amathathu lengxenye- 380.
IZIMSEC ithi izama ngazo zonke indlela ukuba imihloliso ingaqilwa esithi bafuna ukuba umthetho we ZIMSEC Act ubanikeze amandla ukuba labo abaqilayo bajeziswe ngokuphiwa iminyaka eminengi ejele.
Isikhulumeli sogatsha lweze Mfundo uMnu Taungana Ndoro uthi ugatsha lwakhe luzabeka umthetho we ZIMSEC Act ephalamende ukuba kulungisiswe okunengi okuhluphayo.
IZIMSEC ithi imihloliso ye Ordinary level eye Mathematics paper 1 lo 2, English Paper 1 lo 2 le Combined Science 1,2,3. Isithi imihloliso yaqilwa kakhulu endaweni ezinjenge Chipinge, Masvingo le Zvishavane.
Ukuqilwa kwemihloliso eZimbabwe sekusabalele lasemakolitshini emfundo yaphezulu kulandela ukuqilwa kwemihloliso eUniversity of Zimbabwe, lapho okwabotshwa khona umkhulu wamapholisa oyenza izifundo zomthetho.
Your browser doesn’t support HTML5
Udaba lokuqila emihlolisweni eka-O-LEVEL siluphiwa nguMlondolozi Ndlovu.mp3