Kube lomkhosi wokukhumbula umuyi uMnu. Ndabaningi Sithole owaba ngu mkhokheli wokuqala webandla le-Zimbabwe African National Union (ZANU). Njalo waba ngomunye wabakhokheli abansundu abaqalisa umzabalazo wempi yenkululeko.
Lumkhosi wenziwe NgoMvulo ntambama. Abe Ndabaningi Sithole Foundation, bahle bathatha leli thuba lokwethula ugwalo olwesibili olumayelana lo-Sithole eluthiwa; African Nationalism.
Abakhulume kulumbuthano bebetshayela uSithole ihlombe, njalo bemncoma ngokuzinikela kwakhe empini yokukhulula ele-Zimbabwe, langokubhala imbali yalempi kugwalo lwakhe.
USithole waloba ugwalo olulenhloko ethi: “Africa Nationalism,” ngomnyaka ka-1959, ngesikhathi abantu abanengi bengakazwisisi ngezombusazwe.
Omunye walabo abakunhlanganiso ye-Ndabaningi Sithole Foundation, uNkosikazi Sekai Holland, uthi uSithole wenza umsebenzi omkhulu.
“Thina ama-Trustees, singabantu abahlanganiswe liqiniso. Umuntu onguyena owapha i-Africa yonke ukukhanya. UNyerere wayethi engakabali ibhuku lika Sithole wayengazwisisi indaba ze-Africa. Yikho okukhulu asenzela khona”
Uqhubeke esithi bayathokoza ngokuba uMongameli Mnangagwa unikeze uSithole inhlonipho ye-qhawe lesizwe loba esowabhubhayo.
“Sithanda ukubonga uMongameli ngokumkhumbula uSithole. UMongameli owayekhona wayefuna sikhohlwe imbali yakhe kodwa nankophela siyamkhumbula lanamhlanje”
Indodakazi ka Sithole uNkosazana Sifiso Sithole-Barrow, uthe bayathokoza ukuba uyise usekhunjulwa esithi lokhu kumele kwenzelwe amaqhawe wonke awa kwele- Zimbabwe.
“Liqakatheke kakhulu ilanga lanamhlanje. Livusa ukuqakatheka kuka baba wethu. Kafanga; ungathi uvukile, ukhona emoyeni. Siyabonga kakhulu ukuthi ubaba laye walilwela leli lizwe. Abanye bemzonda akusizanga lutho”
USithole wathwetshulwa yingwe ngo mnyaka ka-1920, mhlaka 21 kuNtulikazi; ezalwa nguMnu. Jim Sithole owe-Chipinge loNkosikazi Siyaphi Tshuma owe-Nyamayendlovu. Wabhubha ngo mnyaka ka 2000 mhlaka 12 kaMpalakazi.
Wangena kwezombusazwe engumphathisikhwama webandla le-National Democratic Party (NDP) njalo waba ngu mgcinisihlalo webandla le ZAPU.
Wayengu Mfundisi webandla le-United Church of Zimbabwe (UCZ), efundele ubuFundisi kwele Melika.
Kuthe ngesikhathi ibandla le ZANU libunjwa, waba ngu mkhokheli webandla leli. Kuthe ngomnyaka ka-1975 wakhitshwa kulesosikhundla ephuma ejele, lapho ayesepike khona okweminyaka elitshumi, lapho ayebotshwela umsebenzi wakhe wezombusazwe.
Your browser doesn’t support HTML5
KUKHUNJULWA UMUYI U-NDABANINGI SITHOLE.mp3