Uhlangothi lweMelika olubona ngezemali lokumayelana lempahla yakwamanye amazwe olweTreasury’s Office of Foreign Assets Control (OFAC), luthi sebefakele izijeziso zenotho umtaka Mongameli Emmerson Mnangagwa labanye.
Uhlangothi lolu, olwethule umbiko longoMvulo, luthi lufakele izijeziso zenotho uMnu. Emmerson Mnangagwa Jnr., uSandra Mpunga, Nqobile Magwizi, Fossil Agro, Fossil Contracting, loObey Chimuka.
Abanye laba betheswa umlandu wokudlelana loMnu. Kudakwashe Tagwirei, umqondisi weSakunda Holdings, okuthiwa wenza imali enengi okumangalisayo ngokudlelana loMongameli Mnangagwa. USandra Mpunga likhosikazi lika Tagwirei elilama shares kunkampani yeSakunda.
Amankampani afakelwe izijeziso zenotho kuthiwa lawo adlelana leka Tagwirei, laye owafakelwa izijeziso zenotho ngele Melika.
UMnu. Brian E. Nelson, umsekeli kamabhalane wohlangothi lwezemali, uthi izijeziso lezi zifakelwa abephula imithetho, abadlelana lalabo abaphansi kwezijeziso zenotho, abephula ilungelo loluntu labanye.
Kasenelisanga ukuxhumana loMnu. Frederick Shava, umphathintambo kahulumende obona ngokwethulwa kwemibiko, okwamanje osemhlanganweni weUS-Africa Leaders Summit eWashington DC.