Ukusetshenziswa kwemitshina yakulezinsuku kumncintiswano wenguqu owokudinga intshantshu zomhlaba jikelele oweWorld Cup 2022, odlalelwa kwele Qatar, sekudale inkulumo ngemva kwezinqumo ezithethwe kusetshenziswa iVAR ezidale umehluko kumpumela yeminye imidlalo.
Intathelizindaba yezemidlalo uPraise Dlakama wakoBulawayo ngomunye wabasola inguquko esilethwe yikusetshenziswa kwemitshina yakulezinsuku kuWorld Cup 2022.
“Ukusetshenziswa kwemitshina yakulezinsuku sakuthabela kakhulu ngesikhathi kuqala kodwa nxa sesikhangela imidlalo yezizwe zomhlaba sesikunanzelela ukuba sekukunengi osekuphazamisa indlela okudlalwa ngayo. Khathesi umuntu engahlohla usethikaza lokuthaba kodwa useqala alinde ukuba atshelwe ukuba ukuhlohla kwakhe kuvunyiwe yini.
“Nxa sikhangela sekulezinqumo ezinengi ezitshiye abantu besola njengendlela iqembu leJapan elihlohle ngayo, umbekwa owaphiwa uMessi kanye lasemdlalweni wakuqala kusungulwa umncintiswano. Kumele sibuyele onompembe baphiwe amandla okuthatha izinqumo bengaphathiswa yimitshina ngoba lokhu sekusiphazamisela indlela ibhola elidlalwa ngayo.”
Umqeqetshi owahambisa iqembu labesifazane elimela ilizwe emdlalweni wenguqu kumidlalo yamaOlympics eyaqhutshelwa kweleBrazil ngomnyaka ka2016, uShadrack Mlauzi, uthi yena uyayamukela inguquko elethwe yikusebenzisa indlela zakulezinsuku kumidlalo yezizwe zomhlaba.
“Khathesi akusela sikhathi esokuthi amaqembu adlalise isikhathi ngoba sekulendlela ezintsha ezisetshenziswa ukubona ukuba kumele kufakwe isikhathi esingakanani esokungezelela ngemva kokuba ibhola limiswe ngenxa yezizatho ezitshiyeneyo. Okunye okutsha esiqale ukukubona yikusetshenziswa kwebhola elilakho ukuncedisa onompembe ukuthatha izinqumo ezitshiyeneyo enkundleni ngoba litshengisa ukuba lingabe seliphume lonke enkundleni loba hatshi kanye lalapho kulomdlali osephume ibhobho.”
Olandela umdlalo wenguqu eyisakhamuzi sakoBulawayo, uThando Bhebhe, laye uthi amathuba awokuba lokuqilibezelana asenciphile kakhulu ngaleli nyathela lemitshina.
“Mina ngokubona kwami ukungena kwemitshina yakulezinsuku emdlalweni webhola kuthuthukise kakhulu lumdlalo ngoba kwenze izinqumo ezazingathatheki kakula kudala zithatheke kalula. Okwakungabonakali ngelihlo lenyama sekulula ukuba kubonakale kusetshenziswa imitshina. Inhlanganiso yeFIFA kumele yenze imizamo eyokuba iyehlise isikhathi esithathwa ngonompembe ukuthatha izinqumo, basebenzise iVAR ngokuphangisa.”
Abalandeli bomdlalo wenguqu baphikisane kakhulu ngegoli elihlohlwe liqembu leJapan lidlala leleSpain ngoLwesine ngemva kokuba kusetshenziswe iVAR ukuze kubonakale ukuba ibhola belingaphumanga yini enkundleni phambilini kokuthi eleJapan lihlohle.
Ukunqotshwe kwele Spain ngele Japan nge 2 ka 1 kudale ukuba womabili lawa amaqembu adlulele kusigaba esilandelayo esomncintiswano ephuma kusibaya sikaGroup E kuthi eleGermany libuyele ekhaya.