WASHINGTON DC - Ibandla leCCC lithi selithumele iqula leziphathamandla zalo eBinga ukuthi liyelondoloza ukuthula kulandela udlakela oluqhamuke eSiabuwa kuthange layizolo lapho lelibandla elithi amalunga alo atshaywe ngabasekeli beZanu PF.
Umeli wesigaba seBinga North ephalamende uMnu Prince Dubeko Sibanda wethule imifanekiso yabantu abatshayiweyo besopha igazi, enkundleni yeTwitter, waloba ukuthi amalunga omndeni wakhe lawo atshayiwe.
Udlakela lolu luza ngesikhathi amabandla womabili ekhankasela ukhetho lwama-by-elections, olokudinga amakhansila eBinga ayisithupha.
Kuqhamuke udlakela olufanayo eInsiza laseMatobo ngesikhathi sama-by-elections asanda kwedlula.
UMnu. Fanuel Cumazala, oyisakhamuzi seBinga, njalo elilunga leCCC, uthi abantu laba bebegqoke amakawuso eZanu PF njalo betshayela imota zalelibandla ezine kodwa kusobala ukuthi abayisibo beBinga ngoba abakaze bebabone njalo bebekhuluma ulimi lwesiShona okubangele ukuthi abatshayiweyo bengezwa ukuthi bathini.
Uthi omunye ulalisiwe esibhedlela seBinga njalo abanye belatshwe ekliniki yeSiabuwa kodwa amalunga ebandla leZanu PF abalandele ngakho babalekile baya egangeni kodwa abanye akwazakali ukuthi bangaphi.
Your browser doesn’t support HTML5
Ingxoxo loMnu Fanuel Cumazala
Kodwa isiphathamandla seZanu PF emangweni munye uMnu Kdakwashe Munsaka ukulandule lokhu esithi abeCCC yibo abahlasele amalunga ebandla lakhe.
Your browser doesn’t support HTML5
Ingxoxo loMnu Kudakwashe Munsaka