Abomanyano wenhlanganiso zezakhamizi eye Residents Association for Coalition of Electoral Reforms bathi uhulumende kumele avumele ukuba isilinganiso sabesifazana abancintisa kukhetho lwamakhansili silingane lesabelsilisa kulokuba bakhethwe ngamabandla abo phansi kohlelo lwe proportional representation.
Abe-RACER, bathi uhlelo olwe-Proportional Representation, yikudlalisa imali evele ingeneli ukuqhuba ukhetho olubalulekileyo ukuze abakhethiweyo bamukelwe nguzulu wonke kulokuba amabizo abo abe yilawo avela kumabandla abo ezombusazwe.
Isikhulumeli se-RACER uMnu. Marverlous Khumalo uchasisa ukuba uhlelo lolu lungasebenza njani.
UMnu. Marvelous Khumalo owe Residents Association Coalition for Electoral Reforms (RACER)
“Kade sikhuthaza uhulumende ukuba siyemukela indlela zokuba kube labo mama ephalamende. Kodwa sithi omama laba kumele bancintise hatshi ukuphiwa izikhundla mahlayana”
Uqhubeke esithi kumele kube lendlela ezizabekwa nguhulumende ezokuba amalunga ephalamende lawe khansili engaxotshwa mahlayana njengalokho okwenzakale kuminyaka esande kwedlula lapho amalunga e MDC Alliance axotshwa ngumkhokheli we MDC-T uMnu. Douglas Mwonzora.
“Esikufunayo yikuba thina njengo zulu sivunyelwe ukuba nxa kuxotshwa abameli bephalamende kwenziwe kukhulunywa lathi hatshi ngamabandla ezombusazwe. ”
UKhumalo uthi ukhetho lomnyaka ozayo oka 2023 kumele lwenziwe kungela dlakela esithi inhlanganiso ezisekela uMongameli Emmerson Mnangagwa ezifana le Teachers for ED, Doctors for ED le-Nurses for ED, zilakho ukuphazamisa ukuqhutshwa kokhetho olukhululekileyo ngoba ababalisi bengabanye babantu abavame ukuba emsebenzini wokuvotisa.
Ingcitshi ecubungula ezombusazwe uMnu. Rexor Tshuma uthi lokhu okufunwa ngabe-RACER kunzima ukuguqula ngoba kukusisekelo sombuso.
“Abakufunayo bakhuluma lezihlahla nje. Bafuna ukuba kube lenguquko engeke ibe khona nxa kungaguqulwanga isisekelo sombuso. Kumele lokhu kwenzakale ngokuya kundlela zomthetho abangeke baziguqule. Nxa befuna lokhu kwenzakale kumele benze ukuba umthetho uguqulwe”
UMnu. Felix Mafa isiphathamandla seCCC uthi bavumelana lombono wabe-RACER.
“Thina sikhuthaza ukuba lokhu kwenziwe ngoba silibandla likazulu okubalisa omama labatsha”
UMnu. Mabutho Moyo olilunga le-Central Committee ye-Zanu PF uthi njenge bandla baqakathekisa ukulinganiswa kwamabutho kwabo mama labo baba.
Kunje, ele Zimbabwe selilungiselela ukhetho lomnyaka ozayo oka 2023 lokudinga amalunga edale lephalamende, amakhansila, loMongameli welizwe.
Your browser doesn’t support HTML5
Udaba lwabeResidents Association for Coalition of Electoral Reforms siluphiwa nguMlondolozi Ndlovu