WASHINGTON DC - Amapholisa athi ucwaningo lwe-science olwaziwa ngokuthi yi-DNA, soluveze ukuthi uyise wengane yomntwana oleminyaka yokuzalwa eyisitshiyagalolunye, 9, obelethe kunsukwana ezedluleyo, laye ngumntwana ongumzawakhe kamabeletha oleminyaka elitshumi lantathu, 13.
Uzulu usele ekhuza umhlola ngoMgqibelo ngemva kokwethulwa kwalumbiko yisikhulumeli samapholisa uMnu Paul Nyathi. UMnu Nyathi uthe uphenyo lolu lwenziwe zingcwethi eNational University of Science and Technology (NUST) koBulawayo.
UNyathi uthe njalo umabeletha lomzawakhe lo owamdlwengulayo bazathola ukuxwayisa, i-counselling, kugatsha lwamapholisa olwaziwa ngikuthi yiPolice Victim Friendly Unit ngalesisiga.
Uthe njalo amapholisa asesebenza lezinye ingatsha zikahulumende ukuze babonisane ukuthi ingaphathwa njani linkemenkeme. Abantwana laba bavela eTsholotsho njalo owesifazana lo ubelethele koBulawayo.
Kambe phansi komthetho luphathwa njani udaba olunje njengoba umsolwa laye engumntwana?
"Nxa sesikhangela i-counselling, angazi ukuthi iPolice Victim Friendly Unit ingenelisa ukuluphatha loludaba yini kumbe ingancediswa ngabanye abantu abalesazela kukhonokho," kutsho uSithole, yena oqhubeke echasisa ukuthi umsolwa ngeke abotshwe nguba ngumntwana ongakafikisi iminyaka elitshumi lasitshiyanglombili, 18.
"Ngibona zikhona inhlanganiso ezingaphathisa, akumelanga kuphathwe ngamapholisa kuphela. Yikho okungenzakala kuphela, kunzima ukuthi singabona kuphuma isijeziso."
Kodwa uSithole uthe njalo alubana kuthe kwenzeka umsolwa wetheswa icala, "into engenzakala yikuthi afunyanwe elecala kodwa isigwebo sakhe sibekwe eceleni."
"Laba ngabantwana nje abagangileyo okumele bathole i-counselling, bancediswe ngalokho okuthiwa yi-rehabilitation. Akumelanga umsolwa aphathwe njengesigangi ngoba lokho kungenza ahle abeyisigangi esiqinileyo," uqhubeke echasisa uMnu Sithole.
Your browser doesn’t support HTML5
Ingxoxo loMnu Nqobani Sithole