Ngolwesihlanu iZimbabwe imanyane lamanye amazwe womhlaba ukunanza ilanga lokukhuthaza ukuqedwa kodubo lokuhlukunyezwa kwabesifazana, eleInternational Day for the Elimination of Violence Against Women lapho okuqala khona njalo umkhankaso wokulimukisa uzulu ngokuhlukumezana ezimulini owe-16 Days of Activism Against Gender Based Violence.
Umkhankaso owe-16 Days of Activism Against Gender Based Violence, osungulwe ngokunanza ilanga eleInternational Day for the Elimination of Violence Against Women ngoLwesine, uphela ngenyanga ezayo ekaMpalakazi mhlaka 10, ngelanga lokunanza amalungelo oluntu emhlabeni jikelele eleInternational Human Rights Day.
Lonyaka ilanga leli linanzwa ngaphansi kwesihloko esithi, “Unite Activism to End Violence Against Women and Girls”
UMnu. Desire Moyo wenhlanganiso yeVictory Siyanqoba Trust
lZimbabwe inanza lelilanga lobanje ukuhlukuluzwa kwabesifazana lamantombazana kuhamba phambili emadolobheni lasemaphandleni inengi lisola umumo womnotho omi manzonzo, ezombusazwe lenkolo eziphambana lokulondolozwa kwamalungelo oluntu.
UBulawayo usungule ukunanza umkhankaso owe 16 Days of AGBV ngomcimbi wabalingisi owenzelwe eNkulumane Hall besenza imidlalo yokulingisa ngokuhlukuluzwa kwabomama lamantombazana.
Umphathintambo wako Bulawayo, uNkosikazi Judith Ncube, uthi kuqakatheke kakhulu ukuvikela abantwana, omama labesilisa.
UDokotela Godfrey Dvairo uthi abezempilakahle bayamukela abantwana abanengi abadlwengulwayo bezokwelatshwa.
UNkosikazi Debra Mukasa weBulawayo Vendors and Traders’ Association uthi omama lamantombazana bangafukameli udlakela.
Ngolwesihlanu abemidlalo yokulingisa bakoBulawayo bananze leli langa ngokulingisa ngemidlalo ehlukeneyo lokuhlabelela bethi kuqakathekile ukumelana lodlakela emulini. Omunye wabakade besemcimbini lo ngumqondisi wenhlanganiso yemidlalo yokulungisa, eyeVictory Siyanqoba Trust, uMnu Desire Moyo.
Victory Siyanqoba
EZimbabwe kusukela ngomnyaka ka2021 NgoMpandula kuze kube lonyaka NgoNgcwabakazi abafundi abedlula inkulungwane ezingamatshumi amabili lambili - 22,000 abemfundo yaphansi laphezulu bacine bebanjwa ngamandla ukutshiya isikolo ngoba sebezibone bezithwele bengakuhlelanga njalo besesebancane.
Ingcwethi ezicubungula ngezenhlalakahle yabesifazana zithi isilinganiso soyedwa kwabathathu uyadlwengula ngelanga emhlabeni jikelele. EZimbabwe khona isilinganiso sokungamatshumi amahlanu lambili ekhulwini - 52 percent sabesifazana babhekane lohlupho lokuhlukuluzwa ezweni.
Kumalanga adlule abantwana abancane abangamantombazana abaleminyaka ephansi kwelitshumi lantathu-13 bebebonakala ezindabeni lasezinkundleni zokuxhumana ezebulenjini bezithwele abanye ngabafayo ngesikhathi bebeletha ngoba imizimba yabo isasebuthakathaka.