Uhulumende weZimbabwe ulobelane isivumelwano lenhlanganiso yamazwe aphetsheya eye-Europen Union (EU) esezigidi ezingamatshumi amane lasikhombisa zamadola- US$46 million sokuphathisa lokuqinisa ubudlelwano emsebenzini wezempilakahle lowokuqhutshwa kokhetho elizweni.
Lolu ncedo lubikwa lukhangelelwe ukuphathisa eleZimbabwe kusukela lonyaka kusiya kumnyaka ka2023, inhlanganiso yeEU isithi kuzakuba lezinye izivumelwano ezinhlanu ngomnyaka ozayo.
Izigidi ezingamatshumi amane zamadola – US$40 million ikhangelelwe ukuya emsebenzini wezempilakahle, kuthi izigidi phose eziyisithupha-US$5.9 million izaphiwa ikhomishini elawula ngezokhetho eyeZimbabwe Electoral Commission.
Ekhuluma kusehlakalo sokulotshwa kwalesi sivumelwano umphathintambo wezemali uMnu Mthuli Ncube, ubonge kakhulu abe EU, esithi lolu ncedo luzaphathisa kakhulu kunhlelo zokulwisana lemikhuhlane.
Ummeli we European Union eZimbabwe, uMnu Von Kirchmann, uthe inhlanganiso yakhe izimisele ukuqhubeka incedisa kunhangothi ezehukeneyo zempilo.
Umgcinihlalo wekhomishini eye Zimbabwe Electoral Commission (ZEC), uNkosikazi Priscilla Chigumba uthi limali izapathisa emsebenzini wabo.
Ingcitshi ezicubungula ezombusazwe zithi kumele uhulumende asebenzise limali ngemfanelo ukuze inhlanganiso ezinengi zimethembe. Omunye walezi ngcwethi nguMnu. Matthew Moyo.
Lokhu kusekelwe nguMnu. Robert Siziba isakhamuzi saseHarare.
Phezu kwalolu ncedo inhlanganiso ye-EU ithi izanikeza njalo eyinye imali kunhlanganiso ezizimeleyo ukuze zisizakale kukhetho emsebenzini wokukhangela ukuqhutshwa kuhle kokhetho okunephuli amalunelo oluntu.
Kunje, ele Zimbabwe lilungeleselela ukhetho lokudinga uMongameli, amalunga edale lephalamende kanye lamakhansila olwenziwa ngomnyaka ozayo oka 2023.