HARARE - Namuhla lusuku lapho abantu abanengi eZimbabwe abangena khona ezitaladeni betshengisela emadolobheni amakhulu afana leHarare lakoBulawayo besekela ukugenqulwa kukaMongameli Robert Mugabe libutho eminyakeni emihlanu edluleyo ngo2017.
Abanye baqabula amasotsha bewabonga ngazo zonke indlela, khepha abanengi bayazisola namuhla ngoba bathi owathatha isikhundla sikaMugabe, uMongameli Emmerson Mnangagwa, ungumbusi omubi ukwedlule yena uMugabe.
Umsakazo weStudio 7 ukhulume labanye abaphatheka ekutshengiseleni lokhu bethakazelela ukususwa kukaMugabe ngamasotsha abathi sebezisola kakhulu.
Kodwa abanye, ikakhulu abasekela ibandla leZanu PF, bathi uMnangagwa ubusa kuhle njalo bathi ukutshabalala komnotho kubangelwa yizijeziso zenotho abathi zetheswa eleZimbabwe ngamazwe aphetsheya agoqela iMelika leBhilithani.
Abantu abanengi babambana lebutho belisekela ngokugenqula uMnu Robert Mugabe embusweni ngo2017. Kodwa abanengi bathi sbezisola kakhulu.
Kodwa amazwe la athi izijeziso lezi ziqondiswe kumalunga eZanu PF kuphela, kanti njalo athi umnotho weZimbabwe uhuquluzwa yizikhohlakali zalelibandla.
Ukutshengisela okwenzakala ngosuku lwanamhlanje ngo2017 lokhu kwenziwa ngesikhathi uMugabe elokhe esala ukwethula umbiko wokuthi usesuka esihlalweni lanxa uhulumende wakhe wayesegenquliwe libutho njalo laye esehlala ehanqwe ngamasotsha.
UMnangagwa yena wayelokhe ekweleSouth Africa lapho ayebalekele khona ngemva kokuxotshwa kuhulumende nguMugabe esithi wayezama ukumgenqula.
Wathatha umbuso ekuphendukeni kwakhe uMnangagwa njalo wathembisa ukulungisisa umnotho welizwe knaye lokuhlonipha amalungelo oluntu, okuyizinto abanye abathi azikafekeki.
Your browser doesn’t support HTML5
Udaba Siluphiwa nguMlondolozi Ndlovu