HARARE - Abamele inhlanganiso yamazwe ayephansi kombuso wakwele Bhilithani eyeCommonwealth sebehlangane labanye abantu eZimbabwe lapho abahlolisisa isimo sezombusazwe lokunye elizweni leli elakhutshwa kunhlanganiso le ngowayengumongameli umuyi uRobert Mugabe ngomnyaka ka2003.
Kukhangelelwe ukuba iqula leli lizakwenza imihlangano embalwa lingakagqibi uhambo lwalo kusasa.
Iqula leli selenze imihlangano embalwa labenhlanganiso ezizimeleyo, abalwela ilungelo loluntu, intathelizindaba ezifana loMnu. Hopewell Chin’ono labanye. Abakuqula leli balile ukukhuluma ngohambo lwabo besithi bazaxoxisana lentathelizindaba sebegqiba uhlelo lwabo, olukhangelelwe ukuhlolisisa isimo sezemithetho, ukuqhutshwa kokhetho kanye lezelungelo likazulu.
Inhlanganiso yeCommonwealth yachothoza kakhulu eleZimbabwe isithi iziphathamandla zebandla elibusayo zazikhahlameza uzulu njalo zazivimba ukuba ilizwe liqhube ukhetho olukhululekileyo. Isigodlo seBhilithane laso salile namuhla ukukhuluma ngohambo lolu.
Iqula leli likhokhelwa nguMnu. Luis Franceschi. Omunye wabaxoxe lequla leli, uMnu. Musa Kika, okunhlanganiso yeZimbabwe Human Rights NGO Forum, othi ukhuluma labo ngokwenzakala elizweni.
UMnu. Witness Dube, obona ngokwethulwa kwemiko kubandla leMDC-T ekhokhelwa nguMnu. Douglas Mwonzora, uthi bazahlangana lequla leli.
Abamabandla ezombusazwe, agoqela eleCitizens Coalition for Change Zapu lamanye, balile ukukhuluma ngodaba lolu besithi bazakwethula imibiko yabo kusasa. Ingcwethi kwezombusazwe zithi kumele eleZimbabwe lilungise udaba lokuvikela ilungelo loluntu, ukuqhuba ukhetho olukhululekileyo lokunye ukwenzela ukuthi libuyele kunhlanganiso yeCommonwealth.
UMnu. George Charamba, umsekeli kamabhalane omkhulu ewofisini kamongameli labaphathintambo bakahulumende, uthi bafisa ukuba wonke amazwe akunhlanganiso le akhulume ngokubuyele kwele Zimbabwe kuCommonwealth. UMnu. Lenox Mhlanga, ingcwethi kwezombusazwe, uthi eleZimbabwe kumele lilungise okufunakalayo uma lifisa ukubuyela kunhlanganiso le.
UMnu. Njabulo Ncube, okunhlanganiso yeZimbabwe Editors Forum, uyakusekela lokhu.
UMnu. Bekezela Gumbo, okunhlanganiso yeZimbabwe Democracy Institute, uthi eleZimbabwe selilungele ukuphendukiswa kulumanyano.
Kusukela ngomnyaka ka2017 eleZimbabwe selizame ngamandla wonke ukuba libuyele kunhlanganiso yeCommonwealth kulandela ukususwa embusweni kuka muyi uRobert Mugabe libutho.