Amakhosikazi awezisebenzi zomgodi we Vubachikwe Mine eGwanda alwisane lamapholisa atshisa izindlu amapholisa acina esebenzisa imibhobho ahaza lentuthu ehitshayo eye teargas kusehlakalo abanye abathi sifana xathu lese Makirana kwele South Africa okwadutshulwa kwabulawa izisebenzi zomgodi. Omama laba bebebhikitsha ngokungaholiswa kwabomkabo okwenyanga ezintathu ezedluleyo.
Amakhosikazi la abefika phose amakhulu amabili avuke emadabukakusa elubhekise emgodini wegolide weVumbachikwe ukuyakhonona ngokungaholi kwabomkabo okwenyanga ezintathu.
Ngesikhathi umsakazo weStudio 7 usiyafika eVumba izolo emini omama laba bebevimbe umqondisi walumgodi uMnu None Kananji ngokuthula besithi bafuna abatshele ukuthi iholo labomkabk libuya nini ngoba belamba.
Abanye esixoxe labo bebebhabhule abantwana emhlane kuthi abanye ngabakade bekhulelwe abangathandanga ukuthi baqanjwe ngamabizo.
Amazwi la agcizelelwe ngomunye wabakade betshengisela.
Izisebenzi zeVumbachikwe kubikwa ziphiwa ukudla okungatsho lutho ngenyanga kanye lamahewu nsukuzonke.
Omunye wabakade betshengisela uthi sebebekezele kwenela.
Okumele ngabe bathola iholo lepension labo bakhala ezimathonsi.
Omunye wamakhosikazi la uthi uMongameli welizwe uMnu Emmerson Mnangagwa sekumele angenele kudaba lweVumba.
Kuthe kutshaya ihola lesihlanu omkhulu wamapholisa esiqintini seGwanda uMnu Mandlekosi Moyo ukhulume labomama laba wabacela ukuthi bachitheke ngoba umbuthano wabo ungekho emthethweni kodwa bala bemba phansi.
Ngemva kwalokhu amapholisa asebenzise amateargas ukuchitha labomama labomkabo abakade betshone bevimbe uKananji okudale ukuthi abaleke angene phakathi emgodini weVumba.
Kulapho ke okuqhamuke khona udlame abakade betshengisela sebejikijela amapholisa ngamatshe.
Amapholisa asuke eVumba sesiyalanda imbhobho eGwanda lapho abathe bephenduka bathola abatshengiselayo sebetshise izakhiwo zalumgodi ezigoqela indlu kaKananji, izimota lemitshina esetshenziswa emgodini.
Umsakazo weStudio 7 ubone omama bebubula belele phansi kuthi labo abakade belabantwana babonakale bebagezisa ngamanzi ezulu ukuze bengahitshwa yiteargas.
Inengi kubikwa lilimele kukanti abanye balele egangeni.
Your browser doesn’t support HTML5
Udaba Silethulelwa nguAlbert Ncube