EleZimbabwe likhangelelwe ukuba lizathatha isikhundla somgcinisihlalo wenhlanganiso yokwenjiwa kwamatshe aligugu, amadayimani, eyeKimberley Process, ngesikhathi kulokukhathazeka ukuthi inhlanganiso le, isiphelelwe ngumphako ngoba yehluleka ukukhuza amazwe afana leleRussia lamanye.
UMphathintambo obona ngokwenjiwa kwezemvelo, uMnu. Winston Chitando, nguye ozakuba ngumgcinisihlalo weKimberley Process okwenyanga ezilitshumi lambili ezilandelayo. Inhlanganiso yeKimberley Process ibona ngokwenjiwa kanye lokuthengiselana okuqondileyo kwamatshe aligugu awamadayimana umhlaba wonke jikelele.
Abamele eleZimbabwe emhlanganweni weKimberley Process Plenary
UChitando, emele iZimbabwe, uzathatha intambo ngoLwesihlanu ekuqgitshweni komhlangano oweKimberley Process Plenary oseGaborone kwele Botswana. UMongameli Mokgweetsi Masisi, ekhuluma izolo ekuvulweni komhlangano weKP plenary, uthe ilizwe lakhe lizadlulisela ubukhosi benhlanganiso le kuZimbabwe ngesikhathi umhlaba wonke jikelele ubhekane lobunzima.
“Thina njenge Botswana sithi amadayimana kumele asetshenziswe ukuthuthukisa impilo kazulu. Sithi asincedisaneni ukuvikela uhlangothi lulo ukuze abantu bethola ukuphila ngamatshe la.”
Umgcinisihlalo weKimberley Process ophumayo, uMnu. Jacob Thamage wakwele Botswana uthi bazakhuluma indaba ezinzima ukuzama ukwenza ukuthi inhlanganiso le ibengcono.
“Sizakhuluma kuze kube phakathi kobusuku ukuze silunguse indaba ezibhekane leKimberley Process. Yinhlanganiso yethu, sizayilungisa.”
Kimberley Process Plenary session
Lokhu kuza ngesikhathi kulokukhonona okuvela kwamanye amalunga eKimberley Process athi inhlanganiso le isinjengenja engalumiyo, ikakhulu kukhangelwe okwenzakala kwele Russia.
Amalunga afana le-Kimberley Process Civil Society Coalition, acabangela ukuthi eleRussia lisebenzisa imali eliyithola kumadayimana ukulwisana lelizwe leUkraine. Isikhulumi seKimberley Process Civil Society Coalition, uNkosazana Simiso Mlevu, uthi bayadana ukuthi inhlanganiso le kayifuni kuguquka lokhe yabunjwa ngomnyaka ka2003. Uthi bakhangele ukuthi eleZimbabwe liqhube inguquko ngesikhathi liphethe ukuba ngumgcinisihlalo weKimberley Process.
Kimberley Process Plenary session
“Sikhangele ukuthi iZimbabwe izaqakathekisa indaba yokuguqula indlela iKimberley Process esebenza ngayo. SIkhangele ukuthi iguqule impilo zabantu.”
UMlevu uthi udaba lwempi yeRussia kanye leUkraine luqhubeka ludabula phakathi inhlanganiso yeKimberley Process.
“Ukungezwani phakathi kwabantu lapho okugejwa khona amadayimani kuyaqhubeka njalo akusafani lokwakukhona kuqalwa iKimberley Process, njengalokho okufana lokungezwani phakathi kweUkraine le Russia. Kodwa ngenxa yokuthi ingcazelo yamadayimani angcolileleyo ayicaci, kunzima ukuthi iKP incedise kundubo ezibhekane labantu.
EleZimbabwe lalo lake lazithola lingaphansi kwelihlo lokhozi phezu kwendlela elalisemba ngalo amadayimani endaweni yeChiadzwa, eMarange. Kodwa kugwalo olukhangelelwe ukwethulwa emhlanganweni lo, amalunga eKimberley Process athi isimo sesaguquka ikakhulu kumacala okungahlonipho ilungelo loluntu.