Igqwetha elimele amalunga edale lephalamende njalo abakubandla leCitizens Coalition for Change, abavalelwe entilongweni besetheswa amacala okutshotshozela udlakela, lithi uMnu. Job Sikhala loMnu. Godfrey Sithole bazonde okumangalisayo ngokwethekelelwa nguMnu. Douglas Mwonzora eChikurubi Maximum Security Prison.
Amagqwetha kaMNU. Job Sikhala LoMnu. Godfrey Sithole
UMnu. Freddy Masarirevhu, omele ababili laba, wethule umbiko lo enkundleni yokuxhumana eye-Twitter esithi uSikhala loSithole bacele ukuthi uNkosikazi Beatrice Mtetwa atshele umthethwandaba ukuba bazonde okumangalisayo ngokwenziwa nguMwonzora. UMasarirezhu uthi abaphathi bentilongo yeChikurubi bavumela abanye abantu ukuthi bebonane lababili laba hatshi abakubandla lakhe, abagoqela uMnu. Nelson Chamisa.
Uthi bazonda kakhulu ngesikhati uMwonzora efisa ukubabona entilongweni. Bathi akuqondanga lokhu njalo yikho okwenza ukuthi bale ukumbona. Kasenelisanga ukukhuluma ngodaba lolu loMwonzora, obengaphenguli umakhalekhukhwini. Abalinda eChikurubi balela uChamisa labanye abakhe ukuthi bethekelele uSikhala, uSithole labanye abalitshumi lanye entilongweni.
Job Sikhala and Godfrey Sithole have been denied bail several times by the Magistrates Courts
Kusenjalo, idale leHigh Court likhangelelwe ukuba ngoLwesihlanu lizakwethula isinqumo sesicelo sikaMnu. Job Sikhala loMnu. Godfrey Sithole esokuthi bethoniswe amacala besuka ezindlini zabo. Ababili laba, abangamalunga ebandla eliphikisayo eleCitizens Coalition for Change, sebelenyanga ezine bevalelwe entilongweni njalo bengetholi imvumo yokuhlawula isibambiso se-bail.
UJustice Rogers Manyangadze Foroma, obephethe udaba lolu namuhla, uthe uzakwethula okuphume enkundleni yakhe kulandela isicelo sika Sikhala loSithole abathi kunengi osekuguqukile kulandela ukwala kwemithethwandaba ukuthi behlawule isibambiso se-bail.
Imithethwandaba yalile ukunika isibambiso se-bail ababili laba labanye abakubandla leCCC, okuthiwa batshotshozela udlakela kulandela ukubulawa kuka Nkosikazi Moreblessing Ali, oweNyatsime, okucatshangelwa ukuthi wabulawa ngabakubandla leZanu PF.
Ingqwetha labo, uMnu. Jeremiah Bamu, uthi kunengi osekuguqukile selokhu ababili laba babotshwa ngamapholisa. Uthi okunye kwakho yikuthi amapholisa asekhuluma okungazwakaliyo nge-video okuthiwa uSikhala wayiphanyeka enkundleni zokuxhumana etshotshozela udlakela. UBamu uthi kunengi okuveza ukuba ababili laba kumele benikwe isibambiso se-bail.
Abantu abahambe emthethwandaba ngoLwesithathu uMnu. Job Sikhala ecela ukuhlawula isibambiso sebail
USikhala loSithole sebeyalelwe kahlanu ukuba behlawule isibambiso se-bail. UMnu. Pride Mukono, ingcwethi kwezombusazwe, uthi uSikhala loSithole balakho ukwalelwa ukuhlawula isibambiso se-bail.
Kudaba olufanayo, uMantshi uTrynos Utahwashe, namuhla uthe uhlangothi olubona ngokugcinwa kwezibotshwa olweZimbabwe Prisons and Correctional Services, kumele luvumele amagqwetha, odokotela, izihlobo labanye ukuba bebone uSikhala loSithole eChikurubi Maximum Security Prison. Ababili laba kukhangelelwe ukuba bazathoniswa mhlaka 15 kuLwezi. Umantshi uphinde wathi kumele bevunyelwe njalo ukunikwa ukudla yizihlobo labangane. UMnu. Fred Masarirevhu, elinye njalo igcwetha lika Sikhala loSithole, lithakazelela okwethulwe ngumantshi u-Utahwashe.
Abalinda entilongweni yeChikurubi Maximum Security Prison basanda kwalela umka Sikhala ukuthi amnike ikhekhe lokuthakazelela usuku lwakhe lokuzalwa.