Abantu abanengi eZimbabwe bathi eleZimbabwe lizaqhubekela phambili libhidlika kulandela ukubiselwa ezikhundleni eziphezulu kuka Mongameli Emmerson Mnangagwa labasekeli bakhe - uMnu. Constantino Chiwenga loMnu. Kembo Mohadi – emhlanganweni we-Congress ogqhitshwe ngoMgqibelo.
Bathi kukhangelelwe ukuba ilizwe lizaqhubekela phambili libhidlika ngoba sebekhulile abathathu laba, kanye loNkosikazi Oppah Muchinguri Kashiri, umgcinisihlalo webandla leZanu PF.
Bathi bekumele ibandla elibusayo likhethe abantu abatsha hatshi asebekhulile ngoba sebehluleke ukubusa kusukela eleZimbabwe lithola uzibuse. Badaniswa njalo ngokwenziwe libandla leli elithenge imota ezinengi ezokukhankasela ukhetho oluzayo.
UMnu. Nhlanhla Moses Ncube, okunhlanganiso yeFreedom Alliance, uthi kuyayangisa okwenziwe ngabalandeli bebandle elibusayo.
Lokhu kusekelwe nguMnu. Msongelwa Ndlovu, isikhulumeli sebandla leZapu, othi kuyamangalisa ukuba ibandla leZanu PF lithenge izimota ezintsha ilizwe lidonsa nzima.
Kodwa uMnu. Joseph Tshuma uthi ibandla elibusayo likhethe uMnangagwa labanye ngoba liyasuthiseka ngabakwenzela uzulu.