Amalunga ebandla leZanu PF asevumelene ukuba uMongameli Emmerson Mnangagwa uzakuba ngumabhalane omkhulu webandla elibusayo okweminyaka emihlanu ezayo.
Ekhuluma emhlanganweni omkhulu owebandla leli oweCongress, uMnu. Constantino Chiwenga, ongumsekeli kamongameli, uthe izabelo zonke zifuna ukuthi uMnangagwa akhokhele ibandla leli.
Lokhu kusekelwe njalo zinhlangothi zonke zebandla leli ezithi zithakazelela okwenziwa nguMnangagwa. Sokukhangelelwe ukuba ibandla leli lethule umbiko oveza ukukhethwa kuka Mnangagwa, okhangelelwe ukuba uzakhetha njalo amalunga aqakathekileyo. UMnangagwa utshele amalunga ebandla Zanu PF ukuba bazanqoba kukhetho oluzayo.
Ilunga leZANU PF, uMnu. Mabutho Moyo, uvumelane lokwethulwe nguChiwenga esithi uMnangagwa usebenza kakhulu eZimbabwe.
Umsekeli wesikhulumeli sebandla leCitizens Coaltion for Change, uMnu. Felix Mafa, uthi akumangalisi ukukhethwa kuka Mnangagwa. Uphinde wathi kabasoze benqotshwe kukhetho oluzayo.
UMnu. Bekezela Gumbo, okunhlanganiso yeZimbabwe Democracy Institute, uthi ibandla leZANU PF likhanya selilungele ukhetho oluzayo.
Abanye abasemhlanganweni lo bagoqela abamele amabandla akuzwekazi leAfrica anjengele Front for the Liberation of Mozambique, African National Congress, South West African People’s Organization leChama Cha Mapinduzi.