Amalunga ebandla leZanu PF athi athakazelela okwenziwa nguMongameli Emmerson Mnangagwa ngakho-ke bazamkhetha njalo kusasa ukuba akhokhele ibandla leli kuze kwenziwe omunye umhlangano omkhulu oweCongress, sokwedlule iminyaka emihlanu.
Abakubandla leli bathi izabelo zonke zelizwe zithi zizasekela ukuba uMnangagwa abengumabhalane omkhulu webandla leli kukhetho oluzakwenziwa kusasa emhlanganweni weCongress, oqale izolo eHarare. Bathi akulamuntu ngitsho loyedwa ophikise lokhu ngoba uMnangagwa uqhuba kahle umsebenzi wakhe wokukhokhela ibandla leZanu PF kanye lelizwe. UMnu. Mabutho Moyo, okudale leCentral Committee, uthi izabelo zonke ziyakuthakazelela lokhu.
Lokhu kusekelwe nguMnu. Carrington Nyambo, osemhlanganweni lo.
Kwakulemibiko ethi uMnangagwa udlephana lomsekeli wakhe, uMnu. Constantino Chiwenga, okwakuthiwa ufisa ukukhokhela ibandla leli. Kodwa inkokheli yebandla leZanu PF ithi akulamuntu ophikisa ubukhokheli buka Mnangagwa. Abanye abakhangelelwe ukuba bazabuyela ezikhundlani zabo nguMnu. Kembo Mohadi, owaphuma esikhundleni somsekeli kamongameli kulandela imibiko ethi wenza ubutshapha obumangalisayo emacansini. Abanye nguNkosikazi Oppah Muchinguri Kashiri loMnu. Constantino Chiwenga. UMnu. Obert Mpofu ukhangelelwe ukuba uzaqhubekela phambili engumabhalane wenhlelo zonke kubandla leli. Abakhangele okwenzakalayo njalo lengcwethi zombusazwe bathi amalunga ebandla leZanu PF bayamesaba uMnangagwa. uMnu. Rejoice Ngwenya, ingwethi kwezombusazwe, uthi kuyasinda okwenzakala kubandla leli.
Isakhamuzi seHarare, uMnu. Ntando Tshuma, uthi ukungancintiswa kuka Mnangagwa kuveza ukuba ibandla leZanu PF lisebenzisa udlame sonke isikhathi.
Ekhuluma emhlanganweni lo, uMnangagwa ukhuthaze ukuba kube lokuthula kusasa ngesikhathi kukhethwa inkokheli entsha.
Bebegida beqolotsha okwamagama namuhla abasemhlanganweni oweCongress eHarare belungiselela ukuvota kusasa. Abasanda kukhetho ukuba ngamalunga edale leCentral Committee bazakwethulelwa uzulu okusemthethweni kungakenziwa ukhetho lwenkokheli entsha.