Idolobho lakoBulawayo likhangelane lokwengezwa kokuvalwa kwamanzi kulandela ukucitsha kwamandla kagetsi okumpompa amanzi asuka edamu leNyankuni Esigodini.
Kungaleso sizatho ikhansili yalelo dolobho yethule isaziso sokukhuthaza izakhamizi ukuthi zisebenzise amanzi ngonanzelelo ngoba sebezabanjwa ngamandla ukwengeza isikhathi sokuhamba kwamanzi kulaleso esijwayelekileyo.
Lokhu kwengeze ukwesabela ukuqhamuka kwemikhuhlane yesihudo osokuke kwenzakala ngaphambilini ngemva kokunatha amanzi angcolileyo.
UMnu. Willias Dube, umgcinisihlalo wenhlanganiso yeProgressive Residents Association eCowdry Park, uthi ikhansili kumele ihlangane lezakhamizi zibonisane ukuthi uhlupho lwamanzi lungaxazululwa njani.
“Njengezakhamizi zakoBulawayo besicela ukuthi amanzi sibe loPlan B nxa iNyamayendlovu isebenza kawabuye … Ngibona angani abaphambili ngokunanzelela ukuthi amanzi ayafika ebantwini ababe lecebo, ababize izakhamuzi sibonisananeni ngecebo lamanzi ngoba amanzi wona abuya koBulawayo siyawathenga izakhamizi ugetsi siyathenga ababonisane iZesa labakhangelane lezamanzi ukuthi uPlan B ongaphuma kungenziwa njani."
UNkosikazi Methembe Mpofu, isakhamuzi sakoBulawayo, ukhuthaza abazali ukuthi labo badlale eyabo indima bengathumezi abantwana esikolo begula ukuze benqabele ukumemetheka kwesihudo.
Umsekeli kaMeya wakoBulawayo ukhansila Mlandu Ncube uthi abalalwazi lokuthi abekhampani yamandla magetsi eyeZETDC bazaqeda nini.
"Uhlupho lwamanzi lubangelwe yikuvalwa kwamagetsi eNyankuni dam kukhanya kulento abayilungisayo abe Zesa. So, sikhangelele ukuthi ekulungeni kwakho yikho izakhamuzi ezizaba lamanzi khona kodwa kwezinye indawo amanzi ayaphuma loba i-pressure iyabe iphansi."
Imizamo yokukhulumisana lesikhulumeli seBulawayo City Council, uNkosikazi Nesisa Mpofu, ibe liphutha ngoba ubengaphenduli ucingo lwakhe loba imbuzo ethunyelwe ngeWhatsapp.
Kodwa umbiko owethulwe ngabeBCC osayinwe ngosaphethe isikhundla sokuba nguTown Clerk, uNkosikazi Sikhangele Zhou uthi izigaba zonke zedolobho lakoBulawayo kuzabaloku phazamiseka kokubuya kwamanzi kulandela ukucitshwa kwamandla kagetsi yinkampani yeZimbabwe Eletricity Transmission and Distribution Company (ZETDC) edamu leNyankuni mhlaka 19 Mfumfu 2022.
Umbiko munye uthi ukuswelakala kwamandla kagetsi kuleli damu kuzakwehlisa isilinganiso samanzi anathwa nguBulawayo ngoba impompi zokudonsa lawo manzi zisebenzi ugetsi ngakhoke izakhamizi zikhuthazwa ukuthi zisebenzise amanzi ngonanzelelo kuze kulunge.
SEE ALSO:
Udaba Esilethulelwe nguBathabile Masuku