JOHANNESBURG.......Amapholisa labohlangothi lwezamajele kweleSouth Africa sebesungule umkhankaso wokuzingela izibotshwa zeZimbabwe eziyisithupha ezibaleke ejele yeGrahamstown eEastern Cape emadabukakusa lamhlanje.
Ngokutsho kombiko owethulwe luhlangothi lwezamajele kweleSouth Africa, kufohle izigangi eziyisikhombisa okuyisizalwane sakweleSouth Africa esisodwa lezeZimbabwe eziyisithupha.
Abayisikhombisa laba bagoqela uNhamo Muyambo, Francis Chitho, Trymore Chauke, Lubuyo September, Abraham Moyane, Simba Masinge lo Bonnet Kwarrile.
South Africa Police
Isikhulumeli sogatsha lwezamajele umnumnzana Singabakho Nxumalo utshele abezindaba ukuthi sebesungule umkhankaso wokubamba abayisikhombisa laba phakathi kwamahola angamatshumi ayisikhombisa lambili (72 hours).
Uthi inengi lezibotshwa lezi zabotshelwa ukuzingena obhejane, kanti phakathi kwabo ukhona olecala lokudlwengula, ukubulala lokuzama ukubulala. Uxwayisa uzulu ukuthi abikele amapholisa angalokothi ukuzama ukubamba abayisikhombisa laba ngoba beyingozi.
Umnumnzana Nxumalo uthi esinye sezisebenzi zalelijele sibone emadabukakusa ukuthi sekulefasitela elivuliweyo kwase kutholakala ukuthi abayisikhombisa laba beqile babaleka.
Ukuvela kwale imbiko sekulethe inkulumo ezinengi ngezizalwane zeZimbabwe ezidala amacala kweleSouth Africa. Bakhona abasola kakhulu lokhu besithi yikho okudala inzondo yabantu beZimbabwe eMzansi.
Okhokhela inhlanganiso yeOperation Dudula eJohannesburg umnumnzana Sipiwe Shabangu uthi lokhu yibufakazi bento abahlala beyitsho ukuthi inengi lalabo abaselizweni ngokungekho emthethweni balande khona ukuzoganga.
“Uhulumeni wethu awuvuke uphaphame uvuke emaqandeni ngoba sisenkingeni sizalelwe yinja endlini. Lababantu abezanga ngobuhle la ezweni lethu bazodestroyer.”
Kodwake isizalwane seZimbabwe umnumnzana Sevie Moyo, uthi akulunganga ukuthi izibotshwa zeZimbabwe zibandlululwe okwedlula ezinye.
“Akweqanga abantu beZimbabwe kuphela kodwa kwede wonke umuntu oyingozi, but osekuqina yikuthi abantu beZimbabwe abayingozi beqile, but esikufisayo yikuthi babanjwe bonke babuyiselwe ejele ngoba bephule umthetho.
Ukuphatheka kwezizalwane zeZimbabwe ekudaleni amacala kweleSouth Africa ludabamlonyeni oseluvamise ukuqala udlakela lokucwasana ngobuzwe. Amaqembu abalisa eleOperation Dudula sekukudala exwayisa uhulumende ngokuthi kuxotshwe abokuza abaselizweni ngokungekho emthethweni ukuze kongiwe imisebenzi kuphinde kwehliswe ukudalwa kwamacala.