Amalunga ebandla leCitizens Coalition for Change (CCC) atshaywe ngabacatshangelwa ukuba ngabeZanu PF eMatobo bathi kuyadanisa ukuthi bahlaselwe bezikhulumela lezakhamizi ngokhetho lwama by-elections oluzakwenziwa kunsukwana ezilandelayo kuWard 2.
Abanye balimele okumangalisayo kwathi omunye owesifazana obevela thengisa impahla yakhe uhlaselwe ngabantu laba lanxa ebatshele ukuthi akekho kwezombusazwe
Omunye wabalimele kakhulu ngemva kokutshaywa ngabanakanelwa ukuthi ngabe Zanu PF laba, nguNkosazana Sinikiwe Dube.
"Bengisezitolo eTudi 2 abantu laba bafike bèlolaka behamba ngemota zeZanu omunye umfana wathi ngimkhangelani wangihlaba ngempama wangikhaba. Balanda abanye baqalisa ukubatshaya bejikijela ababalekayo. Ngisele ngiphuma igazi ngamakhala sengilesiyezi kodwa abanye balimele kuthiwe bahanjiswe esibhedlela.
UNkosikazi Mayibongwe Nkomo uthi ulokhu elesithuli njalo usehlalela evalweni.
"Esikubonileyo kunzima, ngiyesaba lakhathesi ngibona engani bazaphenduka. Sitshayiwe hayi okokudlala. Thina besincedìsa ukukhampena sifaka ama poster kodwa lezidoti zasitshayela ukuthi sisekela ibandla leCCC. Mina bangitshaye ngamatshe enyaweni leqolo. Ngizwa ubuhlungu okwamagama. Leyana ingikhumbiza iGukurahundi eyaqeda izihlobo zethu ngoba bebekhuluma ngeSiShona."
Unkosikazi Gugulethu Ncube bamtshaye bamlimaza ehamba lomntanakhe babulala lemota yakhe, wazama ukucela ukuthi bamzwele.
"… Ngabengilanda omunye ngisisthi ngumuntu omdala ngabengisithi baba shuwa sengilohlupho wathi luhlupho lwani vele besengikhala khonapho wathi uhlupho lwani ngathi bangibulalele imota yami, wathi ibulewe ngobanii imota yakho ngathi ibulewe yilabo abagqoke izigqoko zeZanu. Uthe ‘stupid mthengisi’ wangitshaya wangilahla phansi wathi bengigiqe bethi rola phansi. Ngikhuluma so ngiyafuthelwa umzimba angisabambi into ezinzima ngoba ngingumuntu ka-dokotela, ngakhitshwa isibeletho angibambi into ezinzima. Baqal’isukungigiqa benginyathela bengenza yonkinto bathi mthengisi uzosithengisa la why ugqoke into eyi-yellow."
Umeli weNkulumane edale lephalamende, uMnu. Kucaca Phulu, obenguye ophethe uhlelo lokukhansela ibandla leCCC kukhetho lwangoMgqibelo ozayo, uthi bamtshaye bamtshiya esizwa ubuhlungu obumangalisayo.
"Besilungisa indaba yoku deployer ama-election agent sizame ukukhulumisana labantu beZanu ukuze bengatshayi abantu. Ngemva kwesikhathi basitshaya kakhulu besitshaya ngamatshe lengodo lama shambok. Bekule samboko engiyibonileyo laphana etshaye omunye wethu kakhulu. Mina-ke ngibe lenhlahla ama-injuries ami ngilimele isandla ngalimala lonyawo lapha engitshaywe khona yimbokodo lalapha eceleni engitshaywe khona ngogodo."
Isiphathamandla sebandla leZanu-PF koBulawayo, uMnu. Elfasi Mashaba, uthi uPhulu nguye ohlokoze intsha yalelibandla ebikhankasela ukhetho oluzayo.
"Bebehambile lesixwayiso sokuthi khona baye campaigner ngokuthula, akula instruction iparty ebanikayo ukuthi bahambe bayekwenza ukudlakela. Kodwa okumangalisayo yikuthi sikubona (ku-video) elanda ukuyabahlokoza abafana bezimele. Kuya khanya njalo futhi ku-video sebemlanda bona sebe sithi nxa ufunukubuya buya kambe umuntu okuthiwa bamblokhile kuthiwa buya kumbe yena nguye ade eblokhe abantu."
Ummeli weHwange Central edale lephalamende, uMnu. Daniel Molokele, obencedisa ukukhankasa, uthi usinde ngesikhala senalithi wangena eguswini labanye watshiya lemota exotshaniswa ngabe Zanu PF laba njalo uthi akulakhetho oluzakhululeka eZimbabwe ngenxa yobudlwangudlwangu bebandla elibusayo.
Isikhulumi samapholisa eZimbabwe Republic Police, uAssistant Commissioner Paul Nyathi uthi amabandla la womabili aphanyeke udaba lwabo emapholiseni eKezi njalo basacubungula udlame lolu.
"We are conducting investigations in relation to reports of political violence and assault which were received from both Zanu PF and CCC members."
Ukhetho luka Ward 2 eMatobo langomgqibelo ozayo kukhethwa uCouncillor omutsha ozathatha isikhundla sikamuyi umnumzana Tom Moyo obengowebandla leZanu PF.
Abancintisayo nguNkosazana Sindiso Ngwenya oweCCC, uMnu. Liberty Nyirongo, weZapu loFrederick Siwela weZanu PF.
SEE ALSO:
Udaba Esilethulelwe nguEzra Tshisa Sibanda