Iqembu leOperation Dududula kwele South Africa selisungule umkhankaso wokuxotsha ababalisi labantwana besikolo abalabazali abavela kwamanye amazwe ezikolweni zakweleSouth Africa.
Umkhankaso weqembu le-Operation Dudula lo usutshiye ababalisi labantwana abadabuka kwamanye amazwe okugoqela labeZimbabwe bethithibele.
Amalunga ale inhlanganiso abetshengisela emahofisini emfundo ezabelweni ezine zelizwe besithi abaphume bonke abokuza ezikolweni kungene amatitshala labantwana bakweleSouth Africa.
Obekhokhela inhlelo zokutshengisela kwale inhlanganiso esabelweni seGauteng, uMnu. Daniel Hadebe, utshele abezindaba ukuthi ngeke bagoqe izandla ababalisi bakwele South Africa bengomatshayinyoka kusebenza abokuza.
Uthi abakufunayo yikuthi bakhitshwe bonke ababalisi bakwamanye amazwe kuqatshwe abeSouth Africa besebengena kuphela nxa kusase lezikhala eziseleyo.
UNkosazana Grace Mamonyane obekhokhela ukutshengisela okuqhutshelwe esabelweni seLimpopo laye uthi indawo zokufunda kufanele ziphiwe abantwana bakweleSouth Africa kuqala.
Uthi kwenzeka kanjani ukuthi amatitshala eSouth Africa ahlale phansi imisebenzi yabo ithethwe ngabantu bokuza. Kulezinkulungwane zababalisi beZimbabwe abafundisa ezikolo ezizimeleyo lezikahulumende kweleSouth Africa.
Akusakhulunywake ngabantwana ngoba inengi labeZimbabwe abasebenza kweleSouth Africa belabantwana abafunda khona.
Umbalisi weZimbabwe uMnu. Bongani Nyathi uthi uhlelo lwedudula lolu luzahlukuluza kakhulu ababalisi labantwana emoyeni.
“Kuyinto ebuhlungu kakhulu ukuthi sibone izenzo ezinje zisenzakala elizweni laseSouth Africa. Sibone ukubandlululwa lokuhlukunyezwa kwabantu ngale indlela ikakhulu otitsha. Okwenziwa nguoperation dudula kubuhlunggu kakhulu.”
Omunye njalo umbalisi weZimbabwe umnumnzana Themba Ntabekhulu Phiri, uthi le into eyenziwa nguoperation dudula yikuchithanje isikhathi.
“Ngeke idudula iqede ukusebenza kwababalisi bangaphandle kulezizikolo ngoba vele idemand inkulu. Idudula mina ngibona engani izasiza ukuthi iphakamise izinga lendlela okuphathwa ngayo ababalisi.”
Ugatsha lwezemfundo lona belungakaphawuli ngokutshengisela kweDudula lokhu. Kodwa phambilini umphathintambo wogatsha lwezemfundo unkosikazi Angie Motshekga uke wakubeka kwacaca ukuthi ngeke ugatsha lwakhe luxotshe umntwana esikolo ngesizatho sokuthi uvela kwelinye ilizwe.