EleBotswana lithi kuqakathekile ukubumba imithetho ekhuthaza ukuphatha kahle izisebenzi okugoqela ezokuza, kungeyinye yendlela engathuthukisa isimo somnotho kweleBotswana.
Lokhu kuvezwe ngoLwesithathu ngesikhathi eleBotswana lisethula amanyethela eliwathathayo ukuthuthusika isimo sezisebenzi kulandelwa imithetho yeInternational Labour Organisation (ILO).
EleBotswana kade liphanyeka uhlelo olutsha olwe Labour Market Observatory, okuyindlela yokufaka isikali kumango othethweyo ukubona ukuthi amalungelo ezisebenzi avikelekile.
Umphathintambo obona ngezemsebenzi kwele Botswana, uNkosikazi Annah Mokgethi, uthi ilizwe lakhe lihamba phambili kuhlelo lolu uma kuqathaniswa lamanye amazwe emhlubulweni oweSouthern African Development Community.
“Uhlelo lokuthi kube lesimo esihle sokusebenza kubomama labo baba, kugoqela abokuza, kuqakathekile ukuthi sibe lesimo somnotho esingakhethi mhlobo.”
UMokgethi uthi kuqakathekile ukuthi kuhluzwe isimo sezisebenzi ukuze kuthuthukise indlela abasebenza ngayo bengahlukuzeki.
Uthi kuzakwenza uhulumende wakwele Botswana abekwazi ukuthi ulezisebenzi ezinjani ukuze abekwazi ukuthi anganikeza amaphepha okusebenza kwabokuza.
“Kumele abaqatshi begcwalise amaphepha bawaphe uhulumende ngezisebenzi zabo ukuze sibe kwazi ukuthi silezisebenzi ezinjani, njalo kusiphathise ekupheni amaphepha okusebenza kwabokuza.”
UMnu. Cephas Tshuma, okukhomithi ebumba ugwalo lweDiaspora Policy, uthi amazwi kamphathintambo Mokgethi, ayehlisa uvalo kunengi eleZimbabwe elisebenza eBotswana.
“Amazwi akhulunywe ngumphathintambo amahle kakhulu sesikhangele okwenzeke eSouth Africa, abanye besesaba ukuthi okwenzakala eSouth Africa kungacina kubuya eBotswana.”
UTshuma uqhubeke esithi eleBotswana ayisilo lizwe elingaphehla izondo njengokwenzeka eSouth Africa, noma nje ilizwe ngalizwe lilengxaki lazo uma kusiza ebantwini bokuza.
“Akufani leGoli, uma umphathintambo ekhuluma amazwi kangaka kupha ukunzinza kwengqondo. Uma kukhulunywa ngabokuza indawo ezinengi kukhangelwa kakhulu abantu abavela eZimbabwe.”
Uhlelo lwe Labour Market Observatory lukhona emazweni atshiyeneyo, kuyindlela yokuthi kubonwe ukuthi izisebenzi, ezakulelozwe kanye lezokuza, zivikelekile, njalo zisebenza zikhululekile.
Inengi leZimbabwe, ikakhulu emazweni angomakhelwane bahlalele evalweni ngesikhathi kuqonga ukuthukuthela kwabokuza, amazwe amanengi esevala amathuba okusebenza kwabokuza.
Kulenani labeZimbabwe elingaphezu nje kwenkulungwane ezimbili (2,400) ezilamaphepha okusebenza okusemthethweni kwele Botswana.