Abohlangothi olubona ngezisebenzi zikahulumende olwePublic Service Commission (PSC) bathi uhulumende uzahlawula imali yama bhonasi kusiya ngokuthi umuntu usebenze njani ngalowo umnyaka.
Kodwa izisebenzi zikahulumende, inengi kungezohlangothi lwezemfundo, zithi akutsho lutho kizo lokho osekusenziwa nguhulumende njengoba ziyagqilazwa.
AbePSCZ balobele iziphathamandla zengatsha zikahulumende zibazisa ngalelinyathelo besithi lizoqala ukulandelwa lonyaka.
Kodwa zona izisebenzi zikahulumende zithi kalitsho lutho kizo lelinyathelo likahulumende njengoba zivele zihlezi ziphiwa imali engatsho lutho.
Umkhokheli wenye yenhlanganiso ezikumanyano walezo ezilwela ilungelo lezisebenzi zikahulumende eye-Zimbabwe National Educators Union, uMnu. Molvin Dube, uthi akulunganga okwethulwe nguhulumende.
“Kuqakathekile ukuthi i-Government ibuyele emuva ngendlela vele endulo eyayisenza ngayo i-bonus inika abantu, izisebenzi zayo. Sikhangelele lokuthi izisebenzi, khathesi currently akulamali abayiholayo, bahola far below imali okumele ukuthi bayithole. Okokuthi i-bonus leyo abayinikayo, yes, izisebenzi zizakuba lesikhathi sokuthi zithi appreciate khona lokho okuyi-bonus abayabe bekuphiwe. Manje nxa besithi i-salary abayinika izisebenzi inlutshwana baphinde bathi i-bonus abasayifaki futhi, ngezinye indlela yikuthatha umuntu ogulayo uphinde umsebenzise ilanga litshisa.”
Ingcwethi kwezenhlalakahle kazulu, uMnu. Effie Dlela Ncube, owenhlanganiso ebona ngezamalungelo abathengi eyeNational Consumer Rights Association, laye uyalisola inyathelo likahulumende.
“Kuyacaca kahle kamhlophe ukuthi uhulumende kazimiselanga ukubhadala ama-bonus kuzisebenzi zakhe, yingakho esephuma lokunye okutsha okokuthi abantu bazabhadalwa ama-bonus ngokuthi basebenze njani kulowo mnyaka. Akusiyonto efaneleyo leyo, bekufanele ukuthi ngabe uyikhulume umnyaka uqala, kungakaze kufike lesi sikhathi lapho osekufanele khona ukuthi abhadale ama-bonus. Yinto engaqondanga, iyephula amalungelo ezisebenzi, engahambisani lamalungelo ezisebenzi avikelwe ngumthetho womhlaba wonke jikelele, avikelwe yi-Constitution yeZimbabwe ngokunjalo. Ngakho ke lokho akufanelanga kwenziwe lonyaka.”
Imizamo yokuthola umbono kahulumende phansi kwenhlanganiso ye Public Service Commission-Zimbabwe, yehlule njengoba osaphethe isikhundla sokuba ngunobhala kiyo, UEdson Badarai, ubengakayiphenduli imibuzo ayithumeleyo ngendlela yokukhulumisana yebulenjini eyeWhatApp njalo engasabeli locingo lwakhe.
Kodwa encwadini esezandleni zeStudio 7, elotshwe yasayinwa ngunobhala wogatsha lwezempilakahle, uRetired Air Commodore Jasper Chimedza, iqondiswe kubaqondisi bezempilakahle ezabelweni zonke zelizwe ama Medical Directors iveza ukuba bemukele umbiko ovele kuPSC othi amabonus kusukela lonyaka azahalulwa kusiya ngokuthi umuntu usebenze njani.