Amalunga ebandla eliphikisayo eleCitizens Coalition for Change aseMelika athi lisasekhona ithuba lokutshengisa amazwe omhlaba ngokwenzakala eZimbabwe lapho okwephulwa ilungelo loluntu, kuhlukunyezwa njalo kubotshwa abalemibono eyehlukene lekahulumende.
Bathi ngoLwesihlanu balomhlangano ozabe ulezikhulumeli ezigoqela ingcwethi ezicubungula ezombusazwe, ezivele eZimbabwe, ezizachasisa isimo esiselizweni okwamanje ngokuphathelane lodlakela osolubhahile ngaphambili kokhetho, kanye lokubotshwa kwabamabandla aphikisayo abagoqela uMnu. Job Sikhala oselenyanga phose ezine evalelwe entilongweni.
USikhala walelwa imvumo yokuhlawula isibambiso sebail ukuze athoniswe icala lokuthi watshotshozela udlakela evela emzini wakhe.
Lanxa uMngagagwa esesukile kwele Melika, balokhe bezakuya tshengisela phambi kwamahofisi eunited nations, emizameni yokubonisa inkokheli zamazwe omhlaba ngenhlupho ezibhekane lozulu weZimbabwe phansi kombuso okhona.
Sixoxe loMnu. Tamburai Gwekwerere, isikhulumeli seCCC kwele Melika, abayibo abaqoqa ukutshengisela lokhu, othi bazangena emigwaqweni loba uMnangagwa esesukile elizweni leli.
UGwekwerere uthi, “Ye! Kuliqiniso ukuthi uMnangagwa usehambile. Besikwazi lokho vele ngoba vele thina besiqoqe ukuthi siyabe sitshengisela ngoMgqibelo, sikwazi ukuthi ye, uyabe engekho, uyabe esehambile. Yena angithi ukhulume izolo. Injongo yethu yikuthi khona kwaziwe ngumhlaba wonke ukuthi silezikhalazo ezinjani. Yena vele uyasizwa noma kuyikuthi sikhulume nini, kodwa lapha senzele ukuthi nje sibuthane abantu bekhona, abantu babekhona, kubonakale emhlabeni wonke indaba esikhala ngazo, izikhalazo zethu, izikhalazo zokubandlululwa, lokuncindezelwa kwabantu eZimbabwe.”
UGwekwerere uthi, “Abantu ababotshiweyo abagoqela uJob Sikhala labanye ababotshwayo, ababotshwe bengelamacala, abantu bonke abacindezelayo eZimbabwe ... Yikho esifuna ukuthi sazise elizweni lonke, emhlabeni wonke nje ukuthi isimo seZimbabwe simi kanje.”
UGwekwerere uphinde wathi uMnangagwa uvika ngokukhuluma ngama-sanctions, wona angayisiwo edale ubunzima obubhekane labantu eZimbabwe.
Uthe ilizwe liphanjaniswa ngumbuso kaMnangagwa ongahloniphi ilungelo loluntu, njalo yikho okubenza bebuthane, batshengisele bekwele Melika ngenxa yokuthi ukutshengisela akuvunyelwa eZimbabwe nguhulumende oncindezela izizalwane.
Ugcizelele esithi, “Siyanxusa abantu, kasibuye ngoMgqibelo, kusasa. Siyabe sikhona phambi kwe United Nations, eDoug ... Park, ephambili kanye leUnited Nations. Basese khona abanye abazwisisayo abafuna labo ukuthi bangezwa ngeZimbabwe. Abakhokheli bamanye amazwe, njalo konke lokhu kuyabe kuphuma emsakazweni elizweni lonke, emhlabeni wonke jikelele.
UMnu. Nick Mangwana, isikhulumeli sogatsha lwezokwethulwa kwemibiko kuhulumende, utshele iStudio 7 ngoLwesine kuhlelo olwe-Livetalk ukuthi abantu bakhululekile ukutshengisela nxa befuna ngoba kulilungele labo, kodwa uhulumende wakhe uyazama ngazo zonke indlela ukuthuthukisa impilo yabantu eZimbabwe.
Uthe inkinga ezibakhona zibangelwa yizijeziso zenotho ezafakelwa ilizwe ngamazwe angentshonalanga.