Abantu abanengi namuhla bavalelise uQueen Elizabeth II, indlovukazi yakwele Bhilithane, engakabekwa emathuneni abokhokho bakhe eWindsor Castle. Bebephosa amaluba abantu abanengi ngesikhathi isidumbu sendlovukazi sidlula emphakathini kube labanye njalo abaqhinqe isililo besithi indlovukazi yayingumunt wabantu abamaze okwesikhathi eside esebukhosini.
Abezindaba abeReuters babika ukuba abantu abavalelise indlovukazi ngabatsha labadala abadabuka emazweni atshiyeneyo.
UMongameli Joseph Biden wakwele Melika leyinye inkokheli yamazwe atshiyeneyo, ivalelise indlovukazi. Bekugcwele njalo lalapho okwenzelwe intshumayelo yokuvalelisa indlovukazi, efihlwe yizihlobo kuphela duzane lomkakhe, uPrince Phillip, owabhubha nyakenye.
I-Windsor Castle yindawo lapho okulaliswa khona abesikhosini. Inengi labo lifihlwe eSt. George’s Chapel. Bagoqela uHeny VIII, owatshona ngomnyaka ka1547, uCharles 1, owagunyulwa ikhanda ngomnyaka ka1649.
UCharles III useyinkosi yakwele Bhilithane. UMnu. Mqondobanzi Magonya, ingcwethi kwezamasiko, uthi kuyabukeka okwenzakale kwele Bhilithane.
Bakhona abadabuka eZimbabwe abachothoza indlovukazi besithi utshone engakalungisi ubukhosi buka Mthwakazi, obabhidlizwa ngabantu bakhe.
Abanye bakhala njalo ngokuthi indlovukazi ayizange ilungise udaba lombhuqazwe weGukurahundi ngoba ngeleso’sikhathi kubulawa abantu eNkabazwe leMatabeleland wayedlelana lowayengumongameli uRobert Mugabe.
Ilunga leMthwakazi Republic Party, uMnu Mbonisi Gumbo, uthi uMnangagwa wesabe ukuyabuzwa ngabanye bakhe ngakwenza eZimbabwe.
Lokhu kusekelwe nguMnu. Robert Moyo othi kumele uMnangagwa alungise okuhluphayo ngekhaya engakagijimeli ezimfeni lemihlangano etshiyeneyo.
Kodwa uMnu. Munashe Mtutsa, okubandla leZANU PF, uthi abancengi ngitsho lakancane ukuba behambe ezimfeni.