Bathabe bamanzi te abakubandla eliphikisayo eleCitizens Coalition for Change (CCC) abalamalunga anqobe kukhetho lwama by-elections ezigabeni ezimbili phakathi kwezintathu eBulilima.
UNkosazana Thokozani Khupe, owebandla leCCC obekhankasela ibandla leli ezigabeni zonke eBulilima, uveze injabulo enkulu ngokunqoba kwebandla lakhe.
Kodwa usola ukuba bethuselwe ngabalandeli bebandla leZanu PF ngesikhathi bebhodabhoda bedinga usekelo lukazulu.
“Njengebandla leCCC, singenile kuWard 1 eBulilima, sisiyacela ivoti ebantwini, sakhuluma labantu sibabuza izikhalazo zabo, besitshela, sibathembisa ukuthi sizazama ukulungisisa izinto zonke abakhuluma ngazo.
“Sithe silokhe sikhankasa sinjalo, imota yomunye ekade ngisebenza laye uNkosikazi Maplanka, yathathwa ngamapolisa, isizatho singesokuthi imota le ilama number plates eSouth Africa, kodwa ibithwele ama members eCCC. Ngingazi ukubana kulicala na ukuthi imota elema number plates zeSouth Africa ayisavunyelwa na ukuthi ithwale ama members eCCC.”
UKhuphe ucine ngokuthi kulomunye welunga lebandla labo owalandwa emzini wakhe esethuselwa ngabebandla leZanu PF ukuthi angancintisi ekhethweni lwama by-elections elwedluleyo.
Kusenjalo, uMnu. Mangaliso Ndlovu, okhokhela ibandla leZanu PF esabelweni seMatabeleland South, uthi bakhengelele ukuba bazanqoba ezigabeni lezi ngokhetho oluzakwenziwa ngomnyaka ozayo.
UNdlovu uthi akuzange kube lodlakela eBulilima ngesikhathi sokhetho.
“Akuphathisi sicabanga ukuthi sizahambisa ezepolitiki ngamandla. Kunceda bani? Khathesi akulamuntu, actually the majority yabantu, in fact, balamafoni, bebezabe berecorder ivideo, yiaudio yini usethusela. Ngubani okewaletha ubufakazi obunjalo?
"Even nginje, ngikengezwa kuthiwa kuke kwabalesehlakalo, kodwa kanye, okuthiwa uThokozani Khupe, bake baya komunye umama esilaye ephathini, besiyamethusela. But sakuthatha njengokuthi ngama frustrations abo kuground. Akusiyinto esesingayibangela umsindo.”
UNdlovu uphethe ngokuthi okudanisayo yikuthi abebandla leCCC yibo abahamba phambili bekhuluma izinto ezingekho.
SEE ALSO:
Ingxoxo Esiyenze LoMnu. Mangaliso Ndlovu