Harare...................
Uhlelo lwe Project Vote 263 lukhangelelwe ukuhuga abasakhulayo abanengi ukuba baphatheke kukhetho lomnyaka ka 2023, ngokubalanda ezinkundleni abazithakazelelayo zangalezi nsuku, kwezemidlalo, imiculo lokunye.
Ekhuluma emhlanganweni lentathezindaba e Harare, NgoLwesibili, umholi walinhlanganganiso uMnu Youngerson Matete uchasisa kabanzi ngabakhangelele ukukwenza phansi kwalolu hlelo.
“Uhlelo esilusungula namhlanje lujonge ukuxwayisa abatsha ngokuqakatheka kodaba lokuvota. Sifuna ukuba wonke umuntu enelise ukuvota okubalisa abatsha. Kumele bazi ukuba kulilungelo labo”
Uqhubeke ekhuthaza abekomishini eqondisa ezokhetho eye Zimbabwe Electoral Commission-ZEC, ukuthi ibone ukuba umumo oselizweni uyavumela abatsha ukuba baphatheke kwezombusazwe njalo kumele uhulumende aphume lenhlelo zokuphiwa kwabo incwadi ezifana lezithupha lama birthcertificate ukuze babhalise ngobunengi babo ngoba kulilungelelo likazulu wonke ukuba avote.
Abatsha balwemukela ngenjabulo uhlelo lolu besithi lubabonisa ngokuqakatheka kokuzikhethela inkokheli elabatsha phakathi. UMnu Matthew Dube ngomunye wabasakhulayo abalombono onje.
“Sikubona kuyinto ebalulekileyo ukuba kuphawulwe uhlelo olufana lalolu. Lokhu kuzenza ukuba abatsha bazizwe bekhululekile ngesikhathi kuyiwa kukhetho ngoba uhlelo lolu luzabapha ithemba lakusasa”
Lokhu kugcizelelwe ngomunye osakhulayo uPius Sibindi yena othi kulusizi ukuba abanengi kabenelisi ukuvota ngenxa yezizatho ezehlukeneyo.
“Siyehluleka ukuvota ngoba inengi lethu aliphiwa amathuba ngenxa yokwethuselwa, ukuswela imali njalo lokuqilwa ngabadala”
Ezinye ingcitshi ezicubungula ezombusazwe zithi uhulumende we ZANU PF akala sifiso sokukhuthaza abatsha ukuba bevote ngoba esesaba ukunqotshwa kukhetho. Kodwa okubandla le ZANU PF uMnu Jairos Ncube uthi uhlelo lolu akumelanga lube sengani lusekela ibandla esithi ukuba mutsha akutsho ukuba umuntu engavotela iZANU PF.
“Esikufunayo yikuba ilizwe likhululeke. Abatsha kumele benze abakwenzayo bengancindezelwa ngumuntu njalo bengatshelwa ngumuntu owokuvotela”
Abatsha abanengi eZimbabwe bakhala ngezizatho ezinengi ezibavimba ukuyabhalisela ukuvota loba ukuncintisa kukhetho, ezifana lokwethuselwa, ukuswelakala kwemali yokuncintisa lokuswela amaphepha ukuba bavote.
Abekomishini eye ZEC kunyanga ezisanda kwedlula basungule uhlelo lokulanda abantu eziqintini ukuba babhalisele ukuvota endaweni eziseduzane labo. Abanengi bathi lolu luhlelo oluhle okumele luqhutshwe zikhathi zonke lungamiswa.
Your browser doesn’t support HTML5
Udaba lohlelo lwabasakhulayo lokubakhuthaza ukubhalisela ukuvota siluphiwa nguMlondolozi Ndlovu