Izakhamizi zakoBulawayo zamukele ngenjabulo enkulu uhlelo lukahulumende olokulanda uzulu emakhaya ethathiswa ingwalo eziqakathekileyo ezigoqela ezokuzalwa lezithupha.
Inengi lithi licela ukuba uhulumende alusabalalise loluhlelo ezigabeni zonke zelizwe ukuze kungabi lesiminyeminye emawofisini kanye lokuthi abantu bathathe lula lezincwadi kungela bugwelegwele.
Uhlelo lokuthathisa incwadi zokuzalwa lezithupha, oluqale ngoMabasa lukhangelewe ukugqitshwa ngoMpandula, lamukelwa kahle nguzulu koBulawayo othi ngabe alumi ngoba luqakathekile.
Isakhamuzi sakiBulawayo, uMnu. Mandla Tshuma uthi uhlelo lolu malungami ngenyanga ezayo kodwa lusabalale lusiwe lasemaphandleni eziqintini ezehlukeneyo zelizwe.
UMnu. Maluba Mhlaba uvumelane loMnu. Tshuma esithi ukusungulwa kwenhlelo ezigabeni kuzehlisa ubumenene lenkohlakalo yokufumbathiswa kwabasebenza emawofisini kaMsitheli ukuze baphumise ngokuphangisa incwadi zabanye.
Olwela amalungelo oluntu, uMnu Effie Ncube, uchaze ukuba kulilungelo labantu ukutholiswa incwadi zokuzalwa lezithupha
Kulabanye abathintwa ngubhuqazwe weGukurahundi abalokhe bengakafinyeleli ukuthola lezi ncwadi abayibo abakhala omkhulu umkhosi besithi kabenelisi ukuzigadela amabhasi ukuyabhalisa koBulawayo ngakhokhe ngabe konke lokhu kwenziwa emahofisini eziqinti aseduzane labo.
Umphathintambo wendaba zasekhaya, uMnu Kazembe Kazembe, ekhuluma koBulawayo evula okusemthethweni indawo yokuthathisa incwadi zokuhambisa, uchaze ukuba baphakathi kohlelo lokukhuphula inani lendawo ezingathathela abantu incwadi zokuzalwa, izithupha lencwadi zokuhamba kwamanye amazwe.
SEE ALSO:
Udaba Esilethulelwe NguAnnastaciah Ndlovu