Isiphathamandla esibona ngendaba zabatsha, uNkosikazi Kirsty Coventry, uthi uhulumende uzaqala njalo uhlelo lweNational Youth Service ngomnyaka ozayo oluzabe lwehlukene loluka 2007 olwalugoqela ezombusazwe njalo lusephula amalungelo abantu.
Ekhuluma ngesikhathi esipha ubufakazi kukhomithi yephalamende ebona ngezemfundo lemidlalo ngodaba lweNational Youth Service, uCoventry uthe uyakwazi ukuba uhlelo lolu lwalungamanga kuhle njalo kabasoze bekwenze lokhu.
Uthe uhlelo lolu luzaqala ngomnyaka ozayo njalo bafuna ukufundisa inkulungwane ezilitshumi njalo abatsha laba bazafunda okwenyanga ezintathu.
Uqhubeke esithi ukungena kuhlelo lolu kungabanjwa ngamandla abazangena kuhlelo lolu bazathola amathuba okuthola imisebenzi kuhulumende ndawonye lokungena emakolitshini emfundo yaphezulu lamathuba okuqala amabhizimusi.
Uthe njalo sekulomthetho ozabekwa oweNational Youth Service Act esithi uzaphawula ukusebenza kogatsha lolu, esithi bazabhoda elizweni lonke besizwa ukuba uzulu ufuna usebenze njani lumthetho.
Uthe abatsha bazafundiswa amasiko, isisekelo sombuso ndawonye lokuba betshiyane lemkhuba emibi efana lenkohlakalo.
Ingcitshi kwezombuswe, uMnu. Mlindelwa Mancitshana, uthi uhlelo lolu vele lusekela abantu bebandla linye.
Uthi kathokozi ngokhethwa kwabantu emsebenzisini ngokuya kuloluhlelo.
“Kuyinto engalunganga ukuthi kuqakathekiswe inational youth sevrice ukuqatsha. Lokhu kutsho ukuba labo abangasobe ZANU PF kabasoze bethole imisebenzi.”
Uthi kathokozi ngokuba uhlelo lolu luzabe lusenzelwa endaweni lapho olwalusenzakala khona ngesikhathi luqala.
Umsekeli wesikhulumeli seCitizens Coalition for Change, uMnu. Felix Magalela Mafa, uthi kabavumelani lohlelo lolu esithi kuqakathekile ukuzwa abatsha ngodaba lolu.
Elinye ilunga le ZANU PF, uMnu. Matthew Sibindi, uthi bayathokoza ngohlelo lolu.
Uhlelo lwe National Youth Service lwamiswa ngomnyaka ka 2007 ngemva kokuba sokuswelakale imali.
Inhlanganiso ezibalisa umanyano wemhlaba oweUnited Nations lenhlanganiso zamalungelo oluntu zakhala kakhulu zisithi uhlelo lolu lwalusephula ilungelo lolunto.
SEE ALSO:
Udaba Esilethulelwe NguMlondolozi Ndlovu