Izizalwane zeZimbabwe eziyisithupha ezihlala kwele Bhilithani lakwele Ireland sezibambe iqhaza zathatha amanyathelo okuthuthukisa imfundo eLupanda, esiqintini seLupane, lapho ezidabuka khona, ngokwakha izindlu zokufundela ezikolo kanye lokuncedisa abafundi abaswelayo ngokubathengela ingwalo.
Ngeviki ephelileyo kuqhutshwe imidlalo yokuqaga leyenguqu eTshayamathole Primary School, ebiyingxenye yenhlelo zabayisithupha laba.
Bekungasi bantu bekuyibunyonyo, ziphume ngobunengi bazo izakhamizi zeLupanda zisiyabukela imincintiswano yemidlalo yabantwana bezikolo zalesisigaba. Imidlalo le iqhutshwe ngenjongo yokuthuthukisa ukubambana kwabantu bakumhlubulo.
Okwenzakale eTshayamathole School eLupane ngesikhathi kulemidlalo yenguqu leyokuqaga ibhola esekelwa ngabadabuka eLupanda abahlala kwamanye amazwe.
Uhlelo lolu luqoqwe ngabayisithupha abahlala phetsheya. AmaSamaria alungileyo la abalisa uOnele Gumpo Mkhombo, Themba Sibanda - Phumakanye, Francis Nkomazana - Elihlo, Lungile Gumpo Masungamala, Bongani Gumpo-Tshayamathole loMaqhawe Mazula-Sipopoma, onguye isikhulumeli ochaza ngokwabenza bacabanga ukusiza izikolo zabo.
"Uhlelo lolu luhle kakhulu bakithi, siyabonga kakhulu laba abaphathisayo ngoba, kuyahlanganisa izikolo kwenza abantwana bethole i-entertainment izakhamizi konke, ukuganga kungehla esigabeni. Siyabonga konke okuthe kwayenzakala. Siyazi ukuthi isports siyanceda kakhulu empilweni zabantwana senza ukuthi abantwana senza ukuthi umzimba uhlale umuhle ngazonke izikhathi."
UNkosana Saneliso Sibanda ngumbalisi Elihlo Primary School njalo ubengumqondisi kumincintiswano yenguqu leyokuqaga le enziwe ngempelasonto.
"ILupanda cluster which is 6 schools ehlanganisa Ilihlo, Imasungamala, Phumakanye, Siphophoma, Khombo and Tshayamathole. So there is ama former students awe Lupanda cluster. Badecider uku giver back to the community through sports. So, baqalisa itournament last year so this is the second time .... bringing communities together through sports sizama lokudeveloper izikolo zethu eziseLupanda cluster."
Isikhulumi ebesiqakathekile kulumkhosi bekunguInspector wezikolo zonke eLupane uMnu. T. Ndlovu, okhulume ngokuqaketheka kwemidlalo.
"Ukuphumelela empilweni kakudingi ukuthi umuntu aqeqetshe ngezifundo leziyana ezaziqakathekiswa kudala eze Science lezenombolo, kodwa imidlalo yonale esiyeyisayo eyenza umuntu aphile. Siyayesizwe abalandela imidlalo yebhola ukuthi bakhona abadlala kwamanye amazwe abahola inkalakatha zezimali yena umuntu engenzanga kuhle eskolo."
Omunye obekhona kulumkhosi nguMnu. Sam Mathe ukhansila wakulindawo.
"Mina ngiyawabonga amadoda lawa, nxa engaqhubeka esenzenje evusa indawo yawo hayi sokungani abantwana abasakwazi ukuthi kungenzwa njani ngokuhlangana; ukuhlanganisa abantwana kudala ukuthi bephinde beyehlangana leSecondary besazana ngcono."
Isabelo seLupanda singaphansi kwe Lupane East. Umeli walindawo edale lephalamende uMnu Mbongeni Dube uthi uyabonga.
"Siyathaba kakhulu ukuthi njengabanikazi be Lupanda, njengabantwana abakhule eLupanda bafuna ukubona iLupanda isiba lotshintsho, okuyinto enhle kakhulu. Sibesesizobonga njalo ngalokho ekade kukhona esigabeni, ezemidlalo abazenzayo iminyaka yonke bencedisa kakhulu ezikolo zonezi abaphuma kizo ukuthi kubelemidlalo yenguqu, lapho esibona khona abantwana beveza amatalenta abo."
Emdlalweni wezenguqu lakubhola lokuqaga elamantombazane kunqobe isikolo seMatshayathole esihle sathanyela inkezo zonke. UNkosazana Peshy Mhlanga, ongumbalisi kulesisikolo ujabule okwamagama.
"Sithethe konke siyathaba, yi great improvement last year sasingani sikuzile but this year siwinile it shows ukuthi we worked very hard both teams netball and soccer sasesiwina. Next year futhi lakho siyathatha, vele bekungayenzi ukuthi ingenile lapha ekhaya wonke ama trophy abesephuma, besifuna wonke esale khona, sithabile sibili."
Bekukuhle okwamagama njalo inzalo yalindawo ithi iyaphambili izithuthukisela isigaba sayo, ikakhulu ezikolo, zona ezithwele nzima ngokusilela kwababalisi lokuswela imfanelo zokusebenzisa.
SEE ALSO:
Udaba Esukethulelwe nguEzra Tshisa Sibanda