Ophethe isikhundla somqeqetshi weqembu leZimbabwe Saints, uGodfrey Paradza, uthi ulethemba elokuba abasoze bagunyulwe kusigaba seSouthern Region Division One loba nje besemsileni wengalane yemiklomelo.
UParadza uthi wayevele eqale engumqondisi weqembu leZimbabwe Saints ekuvuselelweni kwalo kodwa kulez’insuku usegqoka lebhatshi likamqeqetshi.
“Ngilokhu ngikhona ebholeni njalo ngibuyele kuqembu leZimbabwe Saints ngesikhathi abadala belivuselela bangikhetha ukuba ngibe yimeneja yeqembu. Kuthe ngemva kwesikathi abaqeqetshi bonke ababedingwe ukuba bazoqeqetsha iqembu batshiya umsebenzi abafana basala bodwa, ngasengikubona kufanele ukuba ngiphathise abafana ngoba iqembu ngelethu.”
Iqembu leZimbabwe Saints ngelinye lamaqembu alodumo elizweni leZimbabwe njalo abalandeli bomdlalo wenguqu abanengi bafisa ukulibona liphenduka lizodlala kusigaba saphezulu. UParadza uthi lokhu akusoze kubelula ngitsho lakancane.
“Vele abantu balomcabango ongasiwo. Angiboni ukuthi iqembu leSaints belizimisele ukuphenduka kuPremier League. Angithi uyabona ukuthi ibhola akusilo ibizo. Yebo kambe igama elithi Saints likhulu kodwa ukudlala kwehlukene. Uzakhumbula ukuba iqembu leZimbabwe Saints lileminyaka eminengi kabi lacina ukudlala ibhola. Yikho ukuthi iZimbabwe Saints izingavuka isikuPremier League kuyabe kuyikudlalisa isikhathi, kuyabe kungamanga okuyinto kwakhona.”
Iqembu leZimbabwe Saints yilo elihlezi emsileni wengalane yemiklomelo kusigaba se Southern Region Division One Soccer League lilemiklomelo elitshumi lanhlanu ngemva kokudlala imidlalo engamatshumi amabili lambili.
UParadza usezibambe esidukwini kumidlalo emihlanu njalo kuleyo midlalo unqobe kanye, waba ngutshiki lobhanqa kanye, wanqotshwa kumidlalo emithathu, egoqela lodlalwe ngoMgqibelo wona ophele bebhaxabulwe nge4 ka nya liqembu leHwange.
Kusele imidlalo elitshumi lambili ukuba uParadza asindise iqembu leZimbabwe Saints ekugunyulweni kusigaba seSouthern Region Division One Soccer League lisiyadlala kuBulawayo Province Division 2.
UParadza uthi loba kunjalo leliqembu lizasinda ekugunyulweni ekupheleni kwesizini.
“Ukugunyulwa angikwesabi, Angiboni ukuthi ngendlela esidlala ngayo khathesi singazithola sesidlala kusigaba sikaDivision 2. Angiboni ukuthi sesingagunyulwa. Ngilethemba sibili elokuthi sizasinda ekugunyulweni.”
Ngesikhathi esakhula uParadza udlalele amaqembu abasakhulayo agoqela eleHighlanders kanye leZimbabwe Saints. Uthe esemkhulu wadlalela amaqembu abalisa eleZimbabwe Saints, eleTornadoes kanye leleDynamos.
Uke wayazama inhlanhla yakhe kumaqembu abalisa eleCoventry City kanye leleNottingham Forest kwele Bhilithani kodwa akasaqhatshwanga.
Ekwekeleni kwakhe ukudlala inguqu, uParadza uke wayaqeqetsha Eswatini lapho abesebenzela khona iqembu leMbabane Highlanders.
Lapha ekhaya uke waqeqetsha lona njalo iqembu leZimbabwe Saints njalo lokhu ngokwesithathu ukuthi abe ngumqeqetshi walo. Wake wadlalela iqembu labasakhulayo leZimbabwe Under-20. Lokhu ebakhumbula kahle abadlali ayengqikilana labo ababetshibilika okumangalisayo ngesikhathi esadlalela amaqembu atshiyeneyo. Uthi bagoqela uMadinda Ndlovu, Boy Ndlovu, Tanny Banda, Robert Godoka, Edward Katsvere, Moses Chunga, Jimmy Mbewe loJoseph Zulu.