Izizalwane zakwamanye amazwe kwele South Africa ndawonye lezakwele South Africa bezifolile namuhla eHilbrow eJohannesburg emthandaweni wokukhuthaza ukuthula lokubambana, ngesikhathi kuqubuka inzondo enkulu yezizalwane zakwamanye amazwe kwele South Africa.
INkosi yaMaNdebele uBulelani Lobhengula ubesemhlanganweni lo obukhuthaza ukudlelana kahle kwezizwe zonke zomhlaba. (Photo: Benedict Nhlapho)
Induna yakwaMthwakazi kwele South Africa, uThulani Jubane, utshele iStudio 7 ukuthi lo ubungumbuthano ohlelwe ngabezenkolo bebambisane labo njengenkokheli zomdabu ngemva kokubona ukuthi kulokungahlalisani kuhle phakathi kwezizalwane zakwamanye amazwe lezakwele South Africa.
“Inhloso yakho konke lokhu yikuzama ukubonisa ubumbano phakathi kwezizwe zonke ikakhulu isizwe sakwaZulu lesizwe sakithi sikaMzilikazi kaMashobana. Sizobabonisa ukuthi thina lesizwe sakwaZulu siyinto yinye and lokho asikuthengi kuvele kunjalo ngitsho lakudala.”
Abasakhulayo bebegcwele ngeSonto emhlanganweni wezizwe ebezikhuthaza ukudlelana kahle. (Umfanekiso: Thuso Khumalo)
Isizalwane seZimbabwe, uMnu. Mlungisi Tshabalala, uthe umthandazo lo uze ngesikhathi esihle kakhulu lapho sekusanda izehlakalo ezinengi zokuxhophana phakathi kwezizalwane zakwamanye amazwe lezakwele South Africa.
“Njengoba liyakubona ukuthi kulento ezenzakalayo into zabo xenophobia, into zabo dudula yikho lamhlanje kulenhlangano ezinengi ezizokuchitha konke lokhu zithi singu Africa oyedwa zingumuntu oyedwa, singumtwana oyedwa. Sithi Africa unite, we are one as Africans.”
Umkhokheli wezinduna zakwaZulu esabelweni seGauteng, uMbongeni Sibiya, laye utshele iStudio 7 ukuthi akulunganga ukuthi abansundu belwe bodwa.
“Kulomthandazo sifisa kube khona ukuthula kithi sonke kungabikho umuntu ofayo. Induna ayimphathi umuntu ofayo. Yilokho esizokucela. Uyabona simunye asibandlululani. Iculo lilodwa kuhlabela loba ngubani.”
INkosi yaKwaMthwakazi, uBulelani Lobhengula kaMzilikazi, uthe okuqakatheke kakhulu yikuthi lumbuthano ubengowakuqala oveza ukumanyana phakathi kwesizwe sakwaZulu lesakwaMthwakazi.
Abanye abantu abahambe emhlanganweni wezizwe zonke eJohannesburg ngeSonto. (Umfanekiso: Thuso Khumalo)
“Singabantu abanye, singabantu abahlangeneyo, siligazi elinye. SingamaAfrica sisonke akulasidingo sokuthi silwisane. We are talking abouth South Africa, Swaziland, Zimbabwe, but we are talking about people more than borders.”
Langamazwi agcizelelwe ngabebemele amazwe etshiyeneyo kulo umbuthano okugoqela abaseNigeria, eGhana lakwamanye amazwe.
Sekulesikhathi esinengi kuqhamuka ixenophobia kwele South Africa izizalwane zakwele South Africa zisethesa ezakwamanye amazwe umlandu wokubathathela imisebenzi lokudala amacala. Kulokhu kusungule lonyaka inhlanganiso ezibiza ngokuthi Operation Dudula isihambe endaweni ezinengi isithi abantu bokuza bonke abahambe.
Akunyanga zingaki kubulewe isizalwane seZimbabwe elokitshini leDiepsloot umnumnzana Elvis Nyathi owafela ukuthi wayengelaphasipoti ekhombisa ukuthi useSouth Africa ngokusemthethweni.
Abafundisi abebekhokhela kulo umbuthano bathandaze kakhulu kuMvelingqangi besithi bafisa kungasabikhona ukucwasana ngobuzwe eMzansi Africa.