Gaborone............
Umongameli Mokgweetsi Masisi wakweleBotswana uthi indlala yiyo ebangela ukuthi abeZimbabwe bedale amacala kwamanye amazwe, ikakhulu angomakhelwane. Uthi izijeziso zomnotho ezetheswa eyinye inkokheli lamakampani aseZimbabwe, yizo ezidala ukuhlupheka kwabantu balelozwe.
Umongameli Masisi kade ekhuluma eSemolale, emzini oseduze lomngcele weZimbabwe ngoLwesibili, ngesikhathi ekhuluma ngokukhathazeka kokuntshontshwa kwezifuyo.
Amazwe womabili aphakathi kokuzama ukuqeda udubo lokuntshontshwa kwezifuyo emzini esemngceleni, eleBotswana kuyilo elihlaba ophezulu umkhosi.
UMasisi uthi bahlale phansi babona ukuthi indlala eZimbabwe yiyo efuqa abantu ukuthi bengene kweleBotswana bezodala amacala, okugoqela ukuntshontsha izifuyo.
“Udaba lokuthi bayenze abakwenza yindlala. Lani lingazifaka ezicathulweni zabo, kungenzakala lakini. Izindlu kutsha ezakheleyo. Konke kulungiswa ngomlomo.”
UMasisi uthi ukuhlupheka eZimbabwe kudalwa yizijeziso zenotho ezetheswa abanye abaZANU PF, ngakho kumele ziyesulwe ukuzwe umumo womnotho ube ngcono.
“Siayananzelela ukuthi bayahlupheka. Lokhu kungenxa yama sanctions afakwayo. Yikho sisithi kumazwe angentshonalanga awayesule amasanctions la.” Uqhubeke esithi phezu kodaba lokuntshontshwa kwezifuyo, ukhulumisane lomongameli Emmerson Mnangagwa, omtshele ukuthi kulokubambana phakathi kwabeZimbabwe labeBotswana ekudaleni amacala.
UMasisi uthi uvumelana loMnangagwa, ekhuze esithi abeBotswana bayekele ukubambana labeZimbabwe bedala amacala.
Uthi eleBotswana seliqinise ukulinda emngceleni, sekulamasotsha lamapholisa, njalo lokhu sekuqale ukutshengisa izithelo ngoba amacala okuntshontshwa kwezifuyo eseqale ukuyentsha.
AbeZimbabwe kweleBotswana abafana lomnunzana Ntokozo Thebe bavumelana lomongameli Masisi ukuthi amanye amacala adalwa yindlala, kodwa ukuthi ayisiso siqokoqela.
“Ukuthi umuntu awone, kuyabe kuyikuthi ukhule lalakho. Angeke afike aqale ukuwona kuyiyinto akade engayenzi. Ngiyakwala lokho.”
Kodwa uthi ukuhlupheka kwabeZimbabwe akudalwa yizijeziso zomnotho kuphela, bekhomba ibandla leZANU PF ngomunwe.
“Izijeziso zadalwa yiZANU PF, akumelanga siqambele ilizwe amanga. Lokhu kudalwa libandla leZANU PF. Yiyo edale ukuthi siphume sibe kwamanye amazwe. Uma ngabe bekulombuso wabantu ngabantu, ngabe leBotswana asikho.” Sekuzaba lemitshina yama drone alinda emngceleni, okungadala ukuthi labangena eBotswana okungekho emthethweni babhekane lobunzima.
Ngokunjalo uMasisi uthi ikhomithi ebona ngokuqedwa kokuntshontshwa kwezifuyo phakathi kwamazwe womabili, izahlangana emzini esemngceleni ngoNcwabakazi.
UMasisi loMnangagwa bazahlangana ngoNhlolanja womnyaka ozayo behlaziya ingqubela phambili phezu kwaloludaba.