UNetsai Moyo sowaqala iqembu labasakhulayo owayengumdlali wenguqu kuqembu leHighlanders Football Club.
UMoyo, owaziwa kakhulu ngegama elithi Super Netsai, usungule iqembu leSuper Nets ngo2021 ePelandaba lapho ahlala khona.
“Uhlelo lweSuper Nets ngiluqalise ngesikhathi selockdown, khonaphana sekungani kuyavulwa kodwa abantwana bengakabuyeli esikolo. Nginanzelele ukuba abantwana abanengi elokitshini engihlala khona ePelandaba batshona bengenzi lutho yikho ngacabanga ukuba ngibe ngibapha amabhola bezidlalele. Yikho lapho okufike khona umcabango owokuba ngihle ngiqalise elami iqembu. Bekuyinto ebengivele ngifuna ukuyenza kodwa kwasuka kwaphazamisa iCovid. Kuthe sekulabafana laba ngasengiqala ukubaqeqetsha kwahle kwaba yikho ukuqala kweqembu.”
UMoyo usebenza labasakhulayo abaleminyaka engaphansi kwetshumi lanye kusiya kwabaleminyaka elitshumi lasikhombisa.
Iqembu lakhe lidlala kuZimbabwe Football Association Bulawayo Province Junior League kusigaba seSerie B.
Uthi uthole usizo oluvela kubomakhelwane, izihlobo kanye labangane, ukuze ayenelise ukuba yingxenye yeligi yabasakhulayo.
“Amankampani kulezinsuku lawo adonsa nzima yikho kusuka kube nzima ukuthola usekelo. Bakhona kodwa abalozwelo abasemazweni eMelika aseUnited Kingdom abasitshayele imali eyokuthi sibhalise kuligi.
“Bakhona njalo abasincedise ngemvunulo egqokwa ngabadlali nxa sidlala lamanye amaqembu yikho okwamanje siyenelisa ukudlala njalo lamabhola akhonanyana.
Esikudinga okwakhathesi yimali eyokugada sisiyadlala lamanye amaqembu.”
UMoyo uyabadinga njalo abanye angaphathisana labo ukuqeqetsha iqembu lakhe ele Super Nets, njengoba ecina ebatshiya bodwa abafana ngoba engomunye wabasebenza lenhlanganiso yePremier Soccer League ukuba amaqembu alandele imilayo eyokuvikela ukumemetheka komkhuhlane weCOVID-19.
“KuPSL ngiyancedisa njengeCovid – 19 compliance officer. Siyabe sikhangela ukuba konke kuhamba ngendlela yini kulandelwa imilayo eyafakwa lugatsha lwezempilakahle kanye labe Sport and Recreation Commission.”
UMoyo udume kakhulu ngeminyaka yama80s lapho ayedlalela khona iqembu leHighlanders njalo uke wadlalela iqembu lesizwe elamaYoung Warriors.
Ukudlala kwakhe kwaphazamiswa yikulimala kwakhe idolo, okwenze wahlala isikhathi eside engadlali njalo ekuphendukeni kwakhe udlalele iqembu le Red Seal Rovers lalo futhi eleHighlanders.
Eminyakeni eyedluleyo uke waba ngumqondisi wamaqembu abalisa lona eleHighlanders kanye leleZim Leopards.
SEE ALSO:
Kubunjwa Inhlanganiso Yeqembu Lenguqu Enceda Abatsha